صـدقني

بقلم: نشأت عدلي
صدقني بحبــك
وغلاوتك بتزيد يوم عن يوم
وكل ما احاول اهرب منك
بالاقيك دايمًا معايا
الاقى كلامك جوايا
بيحرك فــيّا كل الحنايا
يدق القلب وينسى
إنه كان فى يوم
عاوز يهرب منك

 صدقني بحبــك
نسيت الناس كلها
حتى البلد بأهلها
مش فاكر غيرك إنت
ما هي الدنيا كلها فيك إنت
بقيت كل دنيتي اللي بعشها ليك
بقت أجمل أمنيتي تتحقق ليك
كل همسي وبسمي بقى ليك إنت
ماعرفش أعمل حاجة من غيرك
مانا ماليش في الدنيا دي غيرك
حكاياتي كلها بقت عنك إنت
حتى الضحكة بقت منك إنت

صدقني بحبــك
بحبك .. وحبك ملا كل كياني
بيسري فى دمي وعضمي وفي منامي
بقيت كل الليَّ في دنيتي
طبعًا مانت سبب كل فرحتي
كلمة منك تشفي كل الجروح
وضحكتك بترد فيَّ الروح
بقيت حقيقي أسيرغرامك
أدوب في هواك وفي حلو كلامك
حنانك دايمًا بيحتويني
ودفا كلامك مغطيني
مش عارف من غيرك أعمل إيه
أو بدونك أقول أو أكتب إيه

 صدقني بحبــك
بقت حياتي متعلقة بيك
تفرحني قوى لمسة إيديك
وتهنيّني دايمًا فرحة عنينك
كل فرحة جواك بتسعدني
وكل ضحكة منك تفرحني
صدقني بحبــك

وحبك بقى كل حكاياتي
ومن حبك كل كتاباتي
القلم يجري ويضحك لما يكتب عنك
الورقه تفرح لما تشوف اسمك
حتى الحبر بيسيل من قوة حبك
يخرج الكلام وهو بيصرخ
بحبك . بحبك .

صدقني بحبك
في ليالي البرد الدفا بيجي منك
وأيام الحر النسمة برضة منك
حتى في حزني الفرحة بتبقى منك     
بعد كل دة مصدقني
ولا محتاج دليل تاني
على إني بحبك
صــدقني ..  بجد بحبــك