دخول الانتصار

بقلم : ايهاب شاكر
دخل الملك وسط الهتافات
واتحققت فيه كل النبوات
من موسى وإشعياء
زكريا وملاخي وكل الكتابات
على جحش راكب مش فرس
وارتجت الأرض أقوى من أي جرس
لا في إيده سيف ولا رمح
شق ضلمة الليل وعتمة التاريخ
شمس البر وكوكب الصبح

فرش الناس لبسهم .. نخيلهم وزعفهم
وهتفوا أوصنا .. أوصنا
هتفوا خلِصنا.. لكن من إيه؟ وليه؟
من سلطة أرضية؟!
أصرخوا خلِصنا من أعمالنا الردية
من قلوبنا النجسة والمسبية
يا فريسي
لامتى تهتم بالظاهر وسايب النجاسة في القلب من جوه
فاكر الماية تخليك طاهر فوق بقى انت وهو

دخل الملك وسط الهتافات
واتفرشت الأرض بالورود
أوصنا لابن داود
فرح وهيصة والكل متجمع
ما هو عيد والكل لابس ومتقمع
هتفوله وغنوله
ومفيش كام يوم وقالوا أصلبه
ده مش ملك اليهود
ده يدوب إنسان  زيه زي أي مولود
أصلبوه ابعدوه من الوجود
دمه علينا وعلى أولادنا
ده مقدرش يخلص بلادنا
ولخبط حياتنا وجدول مواعيدنا

ونسيوا وجهلوا إن دمه يطهر قلوبنا
وملكه لينا ولولادنا
اهتفوا يا شعبه "أوصنا"
اهتفي يا كنيسته "كرسنا" وارسلنا
استخدمنا، نشهد عنك
ونعيشك ونعيشلك
نبقى شاشة عرضك للناس
نعلن الإنجيل وبشارة الخلاص
وتدخل القلب مش أورشليم
وتبقى الرب على القلب والبيت
يابو قلب طيب يا كريم
سامحنا على تقصيرنا 
وامسك الدفة وشكل مصيرنا
يا أعظم ملك
يا ملك الملوك