لقاء

بقلم : سوزان قسطندي
يا حبيبى كنت فينك من زمان
فى خيالى كنت شايفاك من زمان
كلماتك.. همساتك.. لمساتك.. كل دا ماهوش جديد
حبك عايش جوه قلبى وكل يوم يعلى الرصيد
فاكر لما قلتلى وقلتلك وكان كلامنا بيحلى معاه السهر
واللا لما خدتنى لبعيد ورحت معاك لحد القمر
لامونا الناس.. واحنا مالنا دا مش عالمهم ده عالمنا

هما كانوا دريوا بينا لما حاولوا يفرّقونا ورجّعتنا دموع عينينا
يسامحهم ربنا.. ياللا ننسى كل لحظة مؤلمة
ياللا نفرح بالمحبة.. ياللا نحقق حلمنا
ياللا بينا نحتفل.. ياللا نخلِّد ذكريات يوم ماشفنا بعضنا
لما عجزت كلماتنا فعبّرت ببريق العين
لما قالت نظراتنا كل كلمات السنين
لما رفرفت قلوبنا.. لما ورّدت خدودنا
لما احلوِّت الحياة وحسينا بروعة شبابنا

أحلامنا كانت حقيقة.. ياللا نحلم باليقين
ياللا بينا نحتفل.. ياللا نخلِّد ذكريات شوق وحنين
ياللا نفرح.. ياللا نمرح.. ياللا نصنع يومنا بكره
بكره أحلى من النهارده بكره لينا مش لغيرنا
كلمة حلوة لمسة أحلى بيتنا عامر بالمحبة
ويزورونا ويحسدونا ويتمنوا دنياهم تحلى

ربنا يفرّح قلوبهم.. بالحب ينوّر حياتهم
ياللا نولّع الشموع.. ياللا نقول شعر وأدب
ياللا نرقص ع الموسيقى ونسمع ألحان الطرب
ياللا تتشابك إيدينا.. ياللا نحضن بعضنا بكل احتواء
ياللا بينا نحتفل.. ياللا نخلِّد ذكريات يوم اللقاء
يا حبيبى كنت فينك من زمان