الفنان مأمون المليجي: نحن أكثر شعوب الأرض تخلفًا

*الشاعر أحمد قدري: 7 آلاف جرح ومزلة وأنت في مكانك يا وطن.
*الشاعر أسامة عبد الصبور: بتخاف من إيه وعلى إيه؟ وهتاخد إيه م الخوف اللي أنت أخدت عليه؟

كتب: عماد توماس - خاص الأقباط متحدون
على أنغام الجيتار وفي أمسية ليلية بمكتبة ديوان بمصر الجديدة، أنشد الفنان "مأمون المليجي" باقة من أغانيه من ألبومه الجديد "غير حروف الغنا" في احتفالية توقيع الألبوم، مساء الجمعة الموافق 7مايو لعام 2010.
غنىَ المليجي أغاني "غير حروف الغنا- أنا عاشق عيونك- ساعات- متحطنيش فى المفرمة- الهرم-حاجات تضحكني، في الشوارع - نحلم سوا...".
وألقىَ الشاعر "أحمد قدري" بعض من أشعاره التي غناها المليجي مثل أغنية "في الشوارع":
في الشوارع
شيء غريب بيناديني
شيء بيفرض جوه مني
حزن عيني
شيء ياخدني يشدني
يرمي حزني ع الشوارع

أترسم كل الوشوش
تتقسم بينا المواجع
أبقى واحد منهم
جرحي هوّه جرحهم
والحقيقة متوهاني

ف الشوارع
حلم عاشق للنهار
شفته ف عيون طيبين
حلم مطحون بالمرار
يطرح غناوي المجروحين
حلم مطحون بالمرار
يطرح غناوي المحرومين
ولامته هنعيش في انتظار
وعلينا بتمر السنين
أترسم كل الوشوش
تنقسم بينا المواجع
اتقى واحد منهم
جرحي هوه جرحهم
والحقيقة متوهاني

ف الشوارع
ليه بنسأل ميت سؤال
والطريق نمشيه و تاني نرجعه
كل حاجه فوق حدود الاحتمال
كل واحد فينا جرحه بيوجعه

أترسم كل الوشوش
تتقسم بينّا المواجع
اتقى واحد منّهم
جرحي هوه جرّحهم
والحقيقة متوّهاني

*أغنية الهرم:
وألقىَ "قدري" أيضًا كلمات شعرية لأغنية "الهرم" لاقت استحسان الجمهور قال فيها:

7 آلاف جرح ومزلة وأنت في مكانك يا هرم
لا طرحت يوم ع الأرض غلة ولا حتى حجرك بالقدم
طلعت فوق على كتفنا وبنينا فيك من دمنا
وأنت اللي شاهد يا هرم على انكسارنا وذلنا
 قالوا ياما في أرض طيبة غيبونا في حكايات
لقوا في قلوبنا طيبة وعيشونا ع الفتات
7 آلاف وإحنا في كلام نسمع خطب نقول تمام
العيب يا خوفو مش عليك العيب على الخلق اللي نام
7 آلاف جرح ومزلة وأنت في مكانك يا وطن

وعلّق "المليجي" على كلمات أغنية "الهرم" قائلاً: إن الهرم أكبر دليل على استعباد هذا الشعب، 25 سنة يبنوا مقبرة لحاكم ليحكمنا"!
وأضاف المليجي: أنه رغم عظمة بناء الهرم إلا أنه رمز للاستعباد والذل الذي تعرض له الشعب المصري، مشيرًا أن هذه هي الحقيقة من وجهة نظره التي يجب أن نواجه بها أنفسنا بأن نعرف عيوبنا ونعالجها ولا نضع رؤوسنا في الرمال، ونقول إننا أفضل شعب ونحن أكثر شعوب الأرض تخلفًا.

* بتخاف من إيه؟!
كما ألقى الشاعر أسامه عبد الصبور بعض من أشعاره منها:
بتخاف من إيه؟.. بتخاف على إيه؟..
وهتاخد إيه م الخوف اللي أنت أخدت عليه؟!

بتخاف من بكره ومن بعده؟
من حلم بيوعد وبيحلف وبيكدب وبيخلف وعده؟

بتخاف م البرق ومن رعده بره الشبابيك؟
بتخاف م السكة اللي بتاخدك فين هتوديك؟
بتخاف م المترو وم الأوتوبيس؟
بتخاف م الضلمة وم الفوانيس؟
ومن الكوابيس اللي تلاحقك ليل ويا نهار؟

بتخاف م النار؟ ومن المشوار؟ ومن الأفكار الهدامة؟
بتخاف ياما..
بتخاف من شغلك ومشاكله؟
بتخاف م الأكل اللي بتاكله؟
بتخاف عفريتك يطلع لك في طريقك ويخضك شكله؟
بتخاف من مين؟
بتخاف م الناس اللي بياكلوا حق المساكين؟
بتخاف م الشارع والفتارين؟.. ومن الجرانين؟ ومن الشاشة؟
من كل الدنيا الغشاشة؟

بتخاف وبخاف
والخوف يتحول سجن كبير
وجبال بنشيلها على الأكتاف
وتطاطي ضهورنا المحنية..
لكن أنا عندي سؤال واحد
وتجاوبه لنفسك مش ليّا
من قبل الخوف أو بعد الخوف
طلعت بطاقة انتخابية؟!؟
حضر الحفل عدد كبير من محبي صوت الفنان مأمون "المليجي" منهم الكاتب الصحفي "سعد هجرس" والفنان "أحمد جوهر".