|
الراسل: أندرو جبرائيل
وسط نهج الأنفاس
أنا شفت بعيني اليمين ناس
من الجوع والفقر بتنداس
وبعيني الشمال شفت ناس
من الظلم والقهر, مات فيهم الإحساس
وبوداني سمعت ناس
بتصرخ من جبروت المسئول النخاس
اللي بيبيع مستقبلهم بدهب ونحاس
وأيديا لمست جروح ناس
من الغدر نسيوا معنى الإخلاص
ولساني داق هم ومُر ناس
لحد أمتى يا لساني هتسكت؟
ولأمتى يا عقلي تحتاس؟
وشامم في ريحة ناس
رشوة ومحسوبية وسرقة واختلاس
سكوت... هدوء
لحظات تأمل وسط نهج الأنفاس
تقدر تقولي هما فين..؟؟
فين اللي قالوا المواطنة بين الوزير والكناس..؟
وفين اللي وعدوا بالرخاء وانعدام الإفلاس..؟
طيب فين اللي عملوا جمعيات لحماية حقوق الناس..؟
ولا هي بربجاندا "إعلام وصحافة" وكلام وخلاص..؟
وبعد الشمس ما تغيب..
90 دقيقة, العاشرة مساءً, القاهرة اليوم, واحد من الناس
وكأن الحياة بقيت مصدر الربح
والتسويق والإعلان بقى بجروح الناس؟!
بتمنى يجي اليوم
وألاقيك يا أبن بلدي تقوم
وترفع من تاني الراس
تختار حياتك... بفكرك وإرادتك
وتصرخ "لأ" لكل صوت وسواس خناس
دة الإنسان بالحرية مخلوق
أزاي يعيش مجبور مخنوق
سكوت... هدوء
لحظات تأمل وسط نهج الأنفاس |
مع القراء 
الأصوات المشاركة فى التقييم: ١ صوت
عدد التعليقات: ٣ تعليق
