أنا ركبت مركبة في النيل..!!

بقلم. ياسر يوسف غبريال
أنا ركبت مركبة في النيل
وقلت أنسى همي
تقلت المركبة
زعل النيل مني
كل دي هموم يا بني؟
أعمل إيه؟
ممنوع أصليِ
مهدور دمي
متهان تمللي
ماشي متغمي
ولو فتحت عيني
يزعلوا مني

أنا ركبت مركبة في النيل
وقلت أتهنى
مالت المركبة
شمال ويمين
والقلب اتمنى
بس يا خسارة
 لا كان فيه هوا
ولا عصافير الجنة
حتى وش النيل كان
غضبان حزين
قلت له إنت عليل يا نيل؟
ضحك وقال:
أنا بس حزين
على اللي سايب حقه
وعايش ذليل مسكين

أنا ركبت مركبة في النيل
وقلت أرتاح
مية وخُضرة
وعِيشة براح
مالت المركبة
قلت يا دي الانشراح
طرطشت المية على قلبي
لقيتني ببكي
على دم الشهدا اللي راح

أنا ركبت مركبة في النيل
وقلت ما ارجعشي
غير لما الظلم يزول
وفرعون ما يحكمشي
مالت المركبة ما اتعدلتشي
ضحكت للنيل ماضحكشي
كشرت ..  نطق وقال:
المية جوايا هتنشف
وفرعون مش هيشمي

أنا ركبت مركبة في النيل
بس في المنام
قلت أحلم
قبل ما يلغوا  الأحلام
مالت المركبة
صحيت مفزوع
بس الأكادة
كان في المركبة يسوع
بكيت
مسحلي الدموع!!