عندما يصبح أطباء مصر ملطشه , من الخاسر ؟؟!!

بقلم: د.وجيه رؤوف
طالعتنا الصحف القوميه وصحف المعارضه بما حدث لخمسه أطباء بمدينه منفلوط ,
والقصه تبدأ حينما مرت لجنه من وزاره الصحه على مستشفى منفلوط ورصدت غياب خمسه اخصائيين عن النوبتجيه ,
وطبعا تم التحقيق مع هؤلاء الخمسه و تم عقابهم بخصم عشره أيام من رواتبهم وذلك لعدم تواجدهم فى النوبتجيه ,

تمام لغايه كده ؟؟

الجماعه الأطباء غابو عن النوبتجيه وتم توقيع الجزاء عليهم ,
المفروض إن الموضوع خلص
 ولكنه لم ينتهى عند ذلك

فقد تم استدعاء الأطباء للتحقيق فى ميدان عام الوزاره ,بالإضافه إلى طلب الدكتور سمير النمكى وكيل الوزاره حضورهم من الساعه التاسعه صباحا إلى الساعه السادسه مساء يوميا إلى  ديوان الوزاره لمده اسبوعين ,

والأغرب فى هذه القصه إن السيد الدكتور سمير النمكى وكيل وزاره الصحه للشئون الصحيه أمر بأن هؤلاء الأطباء لايجلسون فى المكتب بشكل محترم ولكن ينتظروا طوال هذه الساعات على السلم لمزيد من الإهانه إلى الأطباء ,

طبعا الروايه هكذا كما جاءت فى جريده الأهرام التى نوهت إلى أن هؤلاء الأطباء الخمسه إثنان منهم على درجه مدير عام وثلاثه على الدرجه الأولى ,
ولم تذكر الجريده ولا الوزاره  أن هؤلاء الأطباء قد قصرو فى أداء العمل أو أن هناك حالات حرجه قد جاءت فى تلك الساعه ولم تجد طبيبا ,

أى أنه لم يضار أحد من المرضى ,
وهنا قد يصفق البعض للدكتور سمير النمكى وقد يزغرد آخرون ,
ولكن حينما نتصفح الأمور بالتحليل والمنطق  سنجد العجب العجاب ,

فمثلا  كان معظم الأخصائيين يسيرون منذ قرن من الزمان على نظام الإستدعاء أى أنه يوجد طبيب اخصائى يستدعى عند وجود حالات حرجه  وخصوصا أن أغلبيه الأطباء مساكنهم بجوار المستشفى مع العلم بوجود أكثر من نائب لكل تخصص موجودين بالمستشفى لإستقبال الحالات ومتابعتها وإستدعاء الأخصائى عند وجود حالات حرجه ,

أى أن الطبيب الأخصائى لايبيت فى المستشفى ولكن الطبيب النائب هو الذى يقوم بالمبيت  ولذلك سمى النائب بالطبيب المقيم ولا يوجد لقب أسمه الأخصائى المقيم ,

 معايا لحد هنا  ؟؟

لما الأطباء طبعا استائت أمورهم من الناحيه الماديه نظرا لمرتباتهم الضعيفه , طالبو زى خلق الله بالمزيد من المرتبات والحوافز ,
الوزاره قالت لهم : عينينا بس كله من كرامتكم

إزاى بقى  ؟؟!!

الوزاره  قالت : هنعملكم يا أخصائيين ياحبايبى ياللى كلكم فى أواخر الأربعينات والخمسينات نوبتجيات , والنوبتجيه بخمسه وسبعين جنيه ,
بس ياحبايبى يوم النوبتجيه اللى بخمسه وسبعين جنيه  تترزعو فى المستشفى وما تتنقلوش منها خالص وتقفلوا عياداتكم  خالص , واللى مش هيتواجد  هيتهزء ويتبهدل ويمكن كمان يتنقل من المستشفى ,

كده طبعا الدكاتره يخرسوا خالص ومايطالبوش بزياده مرتبات  ويلعنوا  اليوم اللى دخلو فيه الطب ,
ده لو فتحو صالون حلاقه كان يبقى الحال أحسن من كده !!!,

الدكتورالأخصائى الكبير يقفل عيادته ويقعد فى المستشفى أربعه وعشرين ساعه مايتحركش ولا يروح يشوف العيال علشان الخمسه وسبعين جنيه اللى يادوب  يجيبو كيلو كفته فى اليوم الأغبر اللى هياخد فيه النوبتجيه فى اليومين الهباب دول ,

طيب واللهى السمكرى بتاع العربيات ما يقبل الكلام ده ,
وخصوصا بعد قله عدد الأخصائيين فى بعض التخصصات الشىء اللى بيخلى ألأخصائى بيشيل من ثلاثه إلى أربعه نوبتجيات فى الأسبوع ,
فهل من المنطقى إن الدكتور يقفل عيادته ثلاثه أو أربعه أيام كل أسبوع !! ,

طبعا لأ ,
ونظرا لهذا الوضع المهين الدكتور بقت روحه فى مناخيره , يعنى لو حد زنق عليه , هيرمى الأستقاله فى وش ألوزاره  ويقول : سلامو عليكو

والكلام ده مش غريب وده واقعى
وخدو المعلومه دى اللى تعتبر من الأسرار الحربيه ,

إحدى عشر ألف طبيب قدمو إستقالتهم من وزاره الصحه فى القاهره فقط خلال الفتره من عام 2000 إلى عام 2010 أى خلال عشر سنوات فقط ,
والدليل على كلامى موجود على هذا اللينك :

http://www.ebnmasr.net/forum/t90048.html

يبقى هنا إحنا بنؤكد زياده عدد المستقيلين من وزاره الصحه ,
وعلى فكره أنا كان نفسى إن أطباء  منفلوط أول ماوصلو مكتب الدكتور سمير النمكى وإتصرف معاهم التصرف المهين ده

كانو قدموا إستقاله مسببه ولجأو للقضاء اللى يجيب لهم حقهم ويحفظ لهم كرامتهم ,

طبعا للأسف الأطباء جميعا فى موقف لايحسدون عليه فمساكن الأطباء غير مجهزه  وقذره  ولا تليق بطبيب محترم أنه يقيم فيها بالأضافه إلى أن بعض المستشفيات لايوجد بها سكن آدمى ,

فهل فكرت تلك اللجان التى تمر  وتشطب على الدكاتره من التأكد من وجود السكن اللائق الخالى من البراغيت أولا ؟؟  بالطبع لا
ولكنهم الدكاتره الذين كتب عليهم ان يدفعوا ثمن تفوقهم  حقدا من البشر  وحسدا عليهم فى أكل عيشهم,
ولك الله يا جماعه الأطباء

هتلاقوها منين ولا منين
من الوزاره ولا المديريه ولا العلاج الحر ولا  التفتيش المالى والإدارى ولا المحليات ولا كماين المرور ؟؟
كله ييجى على دماغ الطبيب ويخبط

كإن الطبيب مكتوب عليه يقضى عمره يدفع ثمن تفوقه الفكرى والعقلى ,
ولكن إذا أستمر الحال عليه كما هو الآن , ماذا سيحدث مستقبلا ؟؟؟

أعتقد أنه من الممكن أن يأتى الوقت وأنا لآ أتمنى هذا , أن يستقيل معظم الأطباء بواقع ثمانين فى المائه من القوه البشريه الطبيه وأن يكتفوا بعياداتهم الخاصه ,
وساعتها سوف ترتفع أسعار الكشوفات فى العيادات الخارجيه حتى يستطيع الكشف الطبى أن يأتى بمبلغ خمسه كيلو لحمه على الأقل !!

طبعا هتبقى كارثه  وهيدفع المواطن البسيط ثمن تلك المجازفه الغير مقبوله ,
هذه قراءه فيما يمكن أن يحدث مستقبلا ,
ولكى لايحدث هذا يجب أولا :

 معامله الأطباء معامله محترمه تليق بمن أفنى عمره فى الدراسه والأستذكار  وبلاش  قله أدب مع الدكاتره ,
ثانيا: أن يلغى نظام النوبتجيات من الأخصائيين وأن يرجع نظام الإستدعاء  خلال اليوم بنفس سعر النوبتجيه العاديه ,
ثالثا : أن تسرع الوزاره بالضغط على  الحكومه لتطبيق نظام كادر الأطباء ,

يا جماعه حرام أنا أعرف أخصائى محترم لغايه دلوقتى راكب 128  موديل سبعين وبنزقها له كل يوم ,

حرام ده ولا حلال
أنا تعبت من الزق .