"اقتلني شكرًا".. أغنية راب لوصف الحال القبطي الآن

كتبت: ماريا ألفي إدوارد
قام عدد من الشباب القبطي بعمل أغنية راب تسرد مشاكل واضطهاد الأقباط بـ"مصر"، وجاءت تحت عنوان "اقتلني شكرًا"، تضم تأجيل الحكم في قضية "نجع حمادي"، وأحداث الاضطهاد المتلاحقة للأقباط، تقول كلماتها:

مشهد متكرَّر صورته لسه سايبة علامة في الأذهان
أصوات نواح ملت المكان.. صراخ بيخرم الودان
أنهار دماء لناس بريئة.. لطخت جدران الكنيسة
أشلاء جثث أطفال رقيقة.. نفوسهم غالية مش رخيصة
أخرتها إيه؟ إيه الهدف؟؟ إيه الغاية؟؟
هو الجهاد في سبيل الله معناه اغتصاب دم الضحايا؟
في إنهي دين وإنهي شرع يكون القتل عمل بطولي؟
إزاي قاتل هيرضي ربه.. حد يرد عليا قولولي؟

اقتلتي.. اقتلني شكرًا بس بسرعة الله يخليك
مع خالص شكري للشيطان اللي بغبائك ضحك عليك
فلما تشكي تقول الغرب بيربط ناسك بالإرهاب
حط نفسك ثانية مكانهم فكَّر إيه هي الأسباب؟
رسالة لأخويا الإرهابي أنت مجرد وصمة عار
أنا هافضل أحب كل إخواتنا مهما ها تصنع من دمار
ضحايا سلاحك صاروا بفضلك عند الله شهداء أبرار
وأنا حامل صليبي واقف مستني دوري في ساحة الانتظار

القرار:
مهما كان في العالم ظلم
مهما كان في العالم ضيق
واثقين إنه معانا في كل خطوة في الطريق

فكَّر وارجع بالتاريخ سنة مثل هذه الأيام
غول ضخم سلط أعوانه يهاجموا أولاد ملك السلام
الجريمة كانت صريحة واضحة وظاهرة للجميع
الكل قال من غير محال الحكم أكيد هيكون سريع
جلسة والتانية تعدي كترت بعديها الأقوال
استماع لجيوش دفاع مستميتة في القتال
الحكم كل يوم يتأجل ياترى هتطلع إيه العلة؟
أجِّل الجلسة لعدم كفاية الأدلة

حكم في قضية قتل عانى سنة كاملة من التأجيل
لما سألنا الناس قالولنا أصل الفيل محتاج منديل
كانت رسالة واضحة لكل إرهابي عدى على بلدنا وشاف
لو ناوي تستهدف الأقباط من القضاء أوعى تخاف

واللي حصل هيحصل تاني أبسط نتيجة طبيعية
على أكتاف الباشا والباشا حمل كامل المسئولية
بس الظاهر مفيش حق بيرجع في البلد ديا
قررنا نرفع القضية لمحكمة العدل الإلهية

عصر النهضة راجع تاني واللعب من ورا الستار
1727 تقويم جهاد آخره انتصار
إزاي هتكون كنيسة الله من غير ولاد الله
هاتظهر أساميهم في اليوم الثامن مكتوبة في سفر الحياة

ما تخافوش مهما هيحصل إحنا مش هنكون وحدينا
قوات سمائية تحارب عنا مهما كانوا البشر علينا
دي الكنيسة بيته وجسده وهو القادرة إنه يحميها
أبواب الشر بكل جيوشها مش ها تقوى يوم عليها

وأنت يا قبطي أوعى تنسى أنت مين وابن مين؟
حب وسامح اغفر اصفح.. صل لكل بعيد مسكين
اطلب حقك بطريقة تليق بالدعوة اللي أنت جزء منها
خليك إيجابي شارك في بلدك.. صلي طول الوقت عنها

كلمة أخيرة أحب أقولها لكل أخ حبيب
مش صوتك العالي ولا غضبك هو اللي هيفدي الصليب
اطلب من الرب ده سامعك.. فـالرب لمن يدعوه قريب
ومهما طال العمر بيك.. افتكر إنك على الأرض غريب