حزلئوم |
بقلم: مايكل فارس
حزلئوم... مواطن مصري مشئوم مهموم ساعات يكون ذكي وساعات يكون أغبي م اللزوم؛ بيصادف في حياته ناس كتير وكتير، وكل واحد فيهم لية كبير؛ والمثل بيقول اللي ملوش كبير يشتريلة كبير؛ كبير يتحكم في حياته.. تصرفاته.. أوقاته.. حتي صحيانة ومباتة.. كل واحد فيهم بيشتري كبير... وحزلئوم بيتعامل مع الناس دي كوووووول يوم... ناس بساط في التفكير وناس ذكائهم خطير..وناس تانية بتبيع فطير... العامل المشترك فيهم هو التفكير..... والتفكير أشكال وأنواع بتتباع بس اللي بيفكر حقيقي مش كتير.. ولو تم اكتشاف واحد منهم هيكون عقابه خطير... لأن القواعد ما بتسمحش بالتفكير، دي قواعد عايزه واحد ماشي جنب الحيط بخط مستقيم.
لا يحيد ولا يبعد وإن لزم الأمر يدخل جواها..!!
دي قواعد اتحططت من سنين وسنين، بس للمساكين أما الناس التانيين يعملوا مابدلهم برضة من غير تفكير... ولية التفكير مادام مهما اللي حاطين قواعد السنين اللي بيمشي عليها المساكين..
شيطان بيوسوس في ودن حزلئوم: وهما لية ساكتين؛ وع الذل راضيين.؟
حزلئوم: صدقني ياشوشو. (مش هقدر أقول واللهي اصل الحلفان عندنا حرام) البركة فيك وف أمثالك مخليين الناس تاكل في بعض.
الشيطان: إية ده... الحلفان حرام؟ هو انت مسيحي؟
حزلئوم : هنستهبل أومال شيطان جاي توسوسلي ومش عارف رايح لمين...إستنى يا عم أوريك بطاقة الرقم القومي لحسن تكون مكدبني ولا حاجة.
الشيطان: لا لا خلاص صادق صادق من غير ما أشوفها... ياعم أنا عارف بس بهزر معاك!
حزلئوم: المهم إنت وأمثالك اللي خربتوها وقعدتوا على تلها خليتوا الناس تعيش من غير تفكير.. وإنتوا أساسًا ضد الدين أنا مش فاهم؟ لما دوركم الأساسي تبعدوهم عنه مش تقربوهم منة؟ وتخلوهم يلزقوا فيه؟
الشيطان : هههههههه ياه دا انت قديم اوي.
حزلئوم : يا راجل!
الشيطان: وعهد الله.. ذي مابقلك.
حزلئوم: طاب ماتفهمني النظام.. وماتنساش برضة إن احنا حبايب من زمان وبنتعامل مع بعض من سنين وفي بيني وبينك تفاهم وتقارب، عشان كده بخلصلك أي مصلحة بسرعة من غير تعب.
الشيطان : أنت بتخلصهالي أنا... إزاي بقي فهمني؟
حزلئوم: ياااااااااسلام يعني انت بزمتك ياشيخ وحياة سيدك اللبلوبي.. لما الكبير بتاعك (نسيت اقلكم إن الشياطين زيينا ليها كبير) يبعتك عشان توزني عشان أعمل حاجة غلط وأول ما تجيلي مش بعملها علي طول ولا لا.. هننكر أنا عمري ماتعبتك معايا.. ولا خليتك تزن على وداني مره واتنين ولا حاجة ذي الناس التانيين؛ أول ما تقلي الفكره أنا بوافق علي طول.. صح ولا لا..؟
الشيطان : عندك حق ياحزلئوم.. إنت حبيبي من أيام الجيزة.. أنا هقلك ع اللي فيها بس ماتقلش للكبير بتاعي لحسن يبهدلني!
حزلئوم: إيييييييييييييه يبهدلك اية هو أنتوا بتتبهدلوا ذينا من الكبير؟ إيه.. هيرفدك من الشغل يعني؟ ولا هيبعتلك عربية مباحث امن دولة يعتقلوك؟ ولا هييحطك في حبس انفرادي؟ ولايكنش هيديلك استمارة حزب وطني بالعافية وبتوع الثوره يطالبوا بحلك؟ ولا قلك ممكن يعاقبك ويخليك تبطل توز الناس ع الشر.
الشيطان : ده إية الرخامة دي.. إنت بتحًور عليا ولا ايه؟
حزلئوم : إية ده إنت خت بالك.
الشيطان: أه خت بالي.
حزلئوم: خته بكام بقي؟!
الشيطان: أنا ماشي.
حزلئوم: خلاص ياعم بهزر معاك دي انت شيطان خلقك ضيق أوي لية كده؟!!
الشيطان: لا أنا همشي.. ولو رخمت تاني عليا مش هوزك علي اي حاجة.. وده أخر كلام عندي.
عمومًا ياجماعة متقلقوش المره الجاية لما يجي شوشو يوزني هكمل معاه الموضوع، وهعرف منة ازاي بيخلوا الناس تستخدم الدين غلط ويخليهم عايشين من غير تفكير. |
| شارك بآرائك وتعليقاتك ومناقشاتك في جروبنا على الفيس بوك أنقر هنا |
| أعرف مزيد من الأخبار فور حدوثها واشترك معانا في تويتر أنقر هنا |
تقييم الموضوع:
|
الأصوات المشاركة فى التقييم: ١٣ صوت
|
عدد التعليقات: ٢ تعليق
|
