الزمالك السوفيتي

بقلم: ماجد سمير
هدوء تام في المدرج رغم أن الماتش شغال، والكرة رايحة وجاية بين لاعبية الفريقين بشكل سريع لكن الجمهور تقريباً مش بينطق وباين على وشوشهم الكآبة والحزن الشديد، ولأن المنافس مالوش جمهور تقريباً فما فيش صوت في الإستاد لدرجة أنك ممكن تسمع صوت لمسة رجل اللاعب للكرة أثناء التمرير أو التسديد على المرمى.
وفجأة وسط السكتة الكروية اللي أصابت جمهور الزمالك وقف واحد وهو ماسك العلم الأبيض أبو خطين ولابس فانلة النادي وقال بصوت عالي جداً يا حكومة خدي الزمالك الصيني اللي أنتِ باليتينا بييه ورجعي لنا الزمالك بتاعنا الأصلي، دا اتنو قربتوا تحطوا إعلانات زي اللي على السجاير إحذر تشجيع الزمالك يؤدي إلى الوفاة، اللي جنبه ضحك بصوت عالي ورد عليه وقال له طب وأيه دخل الحكومة في اللي بيحصل في الزمالك، قالوا اللي قاعد ورا، ليه أنت مش فاكر بعد حادثة قطر الصعيد طلع عاطف عبيد لما كان رئيس وزراء وقال قدام مجلس الشعب إن الحال في مصر كويس جداً بس الناس زعلانة لأن الأهلي بيلعب وحش وبيخسر والمصريين معظمهم بتشجع الأهلي فعلشان كدا الناس كئيبة، وراح رافع إيديه ومعلي صوته جداً بعدها عرفت إن الزمالك هايتنيل على عينه والأهلي حاله هايتعدل، وحصل.
قاعد جنبي في الإستاد راجل كبير فكر في الكلام وقال ليه لأ، دي حكومة بتفكر بطريقة عفاريتي أمال تلخم الناس إزاي في بعض نص الشعب يبقا منكد بسبب الزمالك والنص التاني بيشمت فيه، المهم إنهم يتلهو عن الحكومة وخلاص، رد عليه مشجع تخين ولابس جلابية بيضاء وقال يا عم إذا كان أحمد نظيف بنفسه قال إن الدولة مهتمة بعودة نادي الزمالك إتلفت له الراجل الكبير في السن وقال صح بأمارة فلوس الأهرام اللي مش عارفين ناخدها وفلوس التليفزيون لحد دلوقتي مافيش سيرة عنها ولا الأرض اللي الزمالك بيدفع فيها ملايين للأوقاف كل سنة، في الوقت اللي الدولة كانت بتأجر أرض الأهلى في الجزيرة بقرش صاغ في السنة لحد سنة 2005، ولما حاولت محافظة القاهرة تزود الإيجار قام مجلس الشعب وإتنفض دفاع عن الأهلي لأنه نادي وطني، ومن ساعتها مابيدفعوش فلوس والحكومة مطرمخة على الحكاية وكأننا كنا أبطال إسرائيل وضحك بسخرية "زمالك تل أبيب".
قام واحد أسمر دمه خفيف قال سمعتوا آخر نكتة عننا رد عليه تاني قول راح مدّي ضهره للملعب وقال: "جماعة إرهابيين خطفوا طيارة بعد ما طلعت من مطار القاهرة فقامت واحدة قالت لأمير الجماعة أنها مش مصرية ومسافرة علشان تراعي أولادها قال لها عفونا عنك، وراح واحد تاني قال وأنا كمان مش مصري وراجع بلدي علشان أشوف أبويا قبل ما يموت قال الأمير عفونا عنك، بعدهم قام واحد قال له أنا مصري وبشجع الزمالك، أمير الجماعة عيط وإدى للمصري فلوس وأمر برجوع الطائرة لمطار القاهرة ونزل سلم نفسه هو والجماعة"، إتعدل واحد قاعد بعد ما ضحك وقال إلا إنتو مش ملاحظين إن دايماً اللاعب المؤمن بيطلع من الأهلي إبتداء من الشيخ طه إسماعيل لحد فضيلة الكابتن أبو تريكة ودايماً بيتقال عن الأهلي إنه نادي الأخلاق والمبادئ والدين ورفع حاجبه وقال بتهكم مع إن الأهلي اسمه الشياطين الحمر.
ومرة واحدة هاج جزء كبير جداً من الجمهور وأصوات كتير كلها بتصرخ اللي بيقول يا نهار إسود دا باين فيه جون تاني هايخش فينا واللي بيدعي والنبي يارب علشان خاطر الجمهور الغلبان دا، دا إحنا مش مستحملين وصوت تالت بيقول استر يارب.... وخلص الماتش وإتغلب الزمالك كعادته هذا الموسم، بصيت لصديقي الصحفي المعروف بانتمائته اليسارية وقلت له أنت مانطقتش طول الماتش فإبتسم ولم يرد عليا ونزلنا مع بعض وأنا عارف مدى حزنه لحبه الشديد للزمالك.
ولما وصلنا للعربية ركبنا وفي السكة قلت له روّق ياعم دي كورة بص لي وقال آه كورة بس الموضوع أكبر من كدا بكتير قلت له يا سلام أكتر إزاي بقى؟؟، فرد عليّ بلغة الخبير وقال لي فاكر الإتحاد السوفيتي والخطر اللي كان بيسببه لأمريكا، قلت بقول لك إيه ماتدخلنيش في نظرية المؤامرة اللي إنتوا غرقانين فيها، قال الكلام دا هو الصحيح البروستوريكا اللي قضت على الإتحاد السوفيتي لصالح أمريكا هي اللي بتتعمل تقريباً في الزمالك، أخذت نفس طويل علشان أفك الخنقة من كلامه، وقلت طب بروستوريكا الإتحاد السوفيتي لصالح أمريكا، بروستوريكا الزمالك لصالح مين قال لي بسرعة لصالح الحكومة طبعاً، قلت له إزاي يا سي "مش جورباتشوف" فقال لما الزمالك يخسر بالشكل دا وتقريباً بينتهي أكثر ناس هاتبقى سعيدة الأهلوية اللي يمثلوا تقريبا 80% من المصريين، وكمل كلامه بثقة يا باشا مش هاتبقى سعيدة بس لأن تفكك الزمالك "السوفيتي" هايخلي ال80% من الشعب يشعروا بالإنتصار، وراح واقف بالعربية وبص لي وقال مهم جداً إن الشعوب المقهورة المكبوتة المحرومة من كل شيء تقريباً تشعر بإنتصار ساحق في أي شيء مهما كان تافة|، ومافيش إنتصار ساحق هاينجح في إلهاء 80 % من المصريين إلا القضاء على الزمالك السوفيتي.
فتحت باب العربية ونزلت وقلت له وأنا ماشي روح على بيتكم في عابدين أنا عندي ميعاد مهم مع مصدر شغل في الزمالك، ورحت راجع ومديت دماغي جوة العربية من الشباك "الزمالك الحي.... مش الزمالك السوفيتي".