دمـعـة عــاصيـه

بقلم: نشأت عدلي
أهديها إلى روح أخى الموحوم الأستاذ جورج توما  فهو الذى أوحى لى بهذه الخواطر  .. وكم كنت أتمنى أن يكون فى وسطنا ليقرئها معنا . 

يادمعتى .. خلاص بقيتى صاحبتى ..فى طلعتى ودخلتى ..قاعده جوه قلقانه .. عايزه تطلعى بس حيرانه.. حيرانه ليه .. مانتى على طول بتتلككى ..إتقلى بقه وإهمدى .. متبقيش خفيفه وعلى طول تطلعى .. كسفّتينى قدام الناس .. وخلتينى مدّارى .. فى كل موقف ألاقيك قدامى .. كل كلمه حلوه تسمعيها .. تتطلعيلى فيها .. نفسى بقى تتلمّى وتهمدى .. ولما اعمل فيها دكر .. واضغط عليكى .. الاقيكى فى عيونى تتحجرى .. وتكتمى صوتى .. وألوان الطيف تهل على سحنتى .. حقيقى بأدب بتطلعى .. بس قلة أدب انك تكسفينى .. وعلى عينك ياتاجر تفضحينى .. ياشيخه حرام عليكى تعبتينى .. إهمدى جوه بقى واتنيّلي .. خليتى جفونى متجرحه .. لا مرهم نافع ولا حتى مناديلي .. طالعه من جوه تعملى ايه .. حتشوفى  بره ايه ..عايزه ترقصى مع جورج وتتمخطرى .. ارقصى ياختى واتحنجلي .. ما كفايه رقصك على جفونى اللى جرحتيها .. ولا جريانك على خدودى اللى كوتيها ..عامله زى البنت اللى دايره على حلّ شعرها ..على طول خارجه  ..طب خلى عندك دم مره وادخلى .. لأ وطالعه تتقعصيلى .. يمين وشمال تترقصى ..الله يسامحك ياجورج طلعت دمعتى .. ماهى بتلكك على كلمة حلوة تتقري ..  اتعـلمى بقه تـتـطلــعى وقت اللزوم .. لكن على الفاضى والمليان .. ملهوش لزوم  .. بيتّحاش الكلام وتحبسيه جوه حلقى .. أعملك ايه .. يانا ياغلبى .. ولو مره اديتك الامان .. واتكلمت بمشاعرى .. الاقيكى طالعالى زى ابو قردان .. حرام عليكى حيرتينى .. خلى عندك دم مره  وانصفينى .. اه يانا ياغلبى منك .. تصدقى لو انتى قدامى .. لانتقم منك ..عارفك حنيّنه وطيّبه .. بس بلاش تبقى قريبه .. قالو لى الميه بتكتّر الدموع  .. بطلت أشرب وانا موجوع  .. قالو لى بطل تعيش جوه الانسان .. طب ازاى .. مانا برضه انسان ..مش عارفلك وصفه توقفك .. ولا طريقه بيها امنعك .. قالو طيب بلاش تحب .. طب معقوله أعيش بدون قلب .. شوفتى البهدله اللى عايش فيها .. اهمدي بقى ولمّيها .. انا خلاص زهقت منك .. ومقروص من كتر حبك .. ولما قفلت عليكى جفونى .. لقيت بحر غرقانه فيه عيونى .. قلت اكتم مشاعرى جوه قلبى .. لقيتك برضه بتنزلى جوه قلبى .. هوه انا ابدا معرفش اخبى .. اعملى معروف خُدى بيدى .. خلينى مره احب من غيرك .. اطلع اللى جوايا من غيرك .. ياشيخه اختشى مره .. وخلينى قاعد من غيرك.. أعمل ايه .. ماليش فيكى حيله .. وكل ما اقول أهرب منك .. ألاقيكى برضه ناطّالى .. يادى النيله ..  لا انا قادر أحوشك .. ولا امنع  وجودك .. خلاص خليكى كده سايبه  .. وعلى الخدود سايله .. حتى اللقمه متسقيه بيكى .. وبقى اسمها لقمة بالدموع ... خاصمينى  بقه  وإزهقى .. إعملى معروف فارقينى... أاااه دانا بقيت منك موجوع.. بيشاورو عليا ويقولو أهو أبو دموع .. مأنّسانى فى وحدتى .. ومعايا فى غربتى .. حتى فى نومى .. على مخدتى .... عارفك رزله ومش حتبعدى إلا وانا فى تربتى .