مسرحية للسخرية من نقيب المحامين بعد تواطؤه مع الحزب الوطني

تقرير: مايكل فارس – خاص الأقباط متحدون
بعد فوز حمدي خليفة كنقيب للمحامين حدثت المفاجأة وهي تحالفه مع الحزب الوطني، لدرجة أن "أحمد عز" أمين تنظيم الحزب يلتقي به ليشكل هيئة المكتب بالنقابة ويجتمع به في فندق "الفورسيزون"، مما أدى لنفور المحامين المعارضين له وللحزب معًا.. فقامت مجموعة من المحامين بتشكيل رابطة اسمها (مجموعة المحامين) والتي هاجمت تواطؤ خليفة مع عز أو نقيب المحامين مع أمين السياسات بالحزب الوطني، وقاموا بعمل (مسرحية مصغرة) بين الطرفين تشرح كيف اتصل أحمد عز بحمدي خليفة لتحديد ميعاد اللقاء وكيف انتهى اللقاء، وانتهت المسرحية بالسخرية من الشعار الذي اتخذه خليفة أثناء ترشيحه كنقيب للمحامين، ونشروها عبرمواقع الإنترنت.. وإلى نص المسرحية:
المشهد الأول
الساعة الثانية والنصف ظهرًا
التليفون يرن (رنة على نغمة شبّاكنا ستايره حديد)
ع: ألو..
ح: أيوة يا باشمهندس السلام عليكم.
ع: أهلا يا سيادة النقيب.
ح: آجى يا سعادة الباشا؟
ع: استنى شوية يا (ح) لسة فيه مشاكل.. الناس مش متفقين.
ح: المشكلة في إيه يا معالي الباشا؟
ع: هريدى بيحاول يقنعهم بس مشكلة إننا نشيل سعيد وخالد من التشكيل عاملة إحراج للناس خصوصًا بتوع الصعيد!
ح: طيب يا معالي الباشا.. حاتصل بحضرتك كمان ساعة..
(تيت.. تيت.. تيت.. الخط أُغلق)
==فاصل إعلاني==
هنا .. على أرض مصر.. وفي الأسكندرية.. الدخيلة.. أكبر صرح صناعي في مصر..
نحن نبني من أجلك ومن أجل مستقبلك..
نحن نساهم في بناء مصر.. نبني.. نعمر.. نشيّد.. ونشكّل هيئة مكتب..
اشتري طن حديد الدخلية تحصل على "خازوق" مجانًا..
===
المشهد الثاني
الساعة 4 ظهرًا..
(التليفون يرن شباكنا ستايره حديد)
ع: أيوة يا (ح)
ح: أيوة يا معالي الباشا.. وصلتوا لحاجة؟
ع: لغاية دلوقتي عشرة وافقوا وستاشر رافضين ومُحرجين من سعيد وخالد!
ح: وبعدين حضرتك.. يعني آجي ولا ما أجيش؟
ع: بص يا (ح) مفيش أدّامنا غير إننا نقدم تنازل.. أنا مقترح نحط سعيد وكيل.
ح: يا معالي الباشا.. دول ما اقدرش اشتغل معاهم، دول بيتأمروا عليا لحساب (س).
ع: خلاص يا (ح) كفاية سعيد وحاشيل لك خالد خالص وسعيد حايبقى في الوكيل وده منصب شرفي.
ح: إللى تشوفه معاليك.. يعنى آجي دلوقتي؟
ع: استنى شوية وأنا حاتصل بيك.
ح: حاضر معاليك.
(تيت.. تيت.. تيت.. الخط أُغلق)
==فاصل غنائي ونعود==
ترن ترن.. ترن ترن
آآآلو.. آآآلو
بابا فين؟
بابا هنا.. هنا هوه.. في الفور سيزون.. أقوله مين؟
قول له عمو
عمو مين؟
عمو عز
طب هو فين.. أنا عمو.. عمو فين؟
===
المشهد الثالث
الساعة الخامسة..
التليفون يرن أغنية (أنا وحدي يا ليل حيران)
ع: أيوة يا (ح)
ح: ايوة يا معالي الباشا.. فيه جديد؟
ع: خلاص يا (ح) الناس زهقت من كتر المناقشة ووافقوا بعد ما حطينا سعيد في الوكيل.
ح: يعني آجي دلوقتي يا معالي الباشا؟
ع: تعالى يا (ح)
ح: حضرتك حاتكون موجود؟.. يعني آجي على قاعة الإجتماعات بتاعة حضرتك؟
ع: لأ.. هم حاينزلوا الفندق دلوقتي يكملوا اجتماعهم وهريدي حايظبطهم لغاية ما انت تيجي.
ح: يعنى حضرتك مش حاتكون موجود؟
ع: أنا حاسيبك تقعد معهم شوية وبعدين حانزل لكم.
ح: حاضر يا معالي الباشا.
(تيت.. تيت.. تيت)
==مسابقة قناة الوفاة==
السؤال الأول
أين تم الإجتماع الأول؟
1- في فندق الفورسيزون.
2- في قاعة اجتماعات البامشهندس في الدور الأول فوق فندق الفورسيزون.
3- في شقة الباشمهندس في الدور الرابع فوق الفورسيزون.

السؤال الثاني
الأعضاء نزلوا مع هريدي من فوق قعدوا فين؟
1- في اللوبي بتاع الفورسيزون.
2- في الكافي شوب بتاع الفورسيزون.
3- في المطعم بتاع الفورسيزون.

** إذا عرفت الحل اتصل بنا على مقر الحزب الوطني فرع الفورسيزون..
أو ادع لجمعية عمومية لسحب الثقة من الفورسيزون.
شعارنا:
غدًا يتحدث العالم عن نقابة المحامين.. يعنى سيرتنا حاتبقى على كل لسان.