هلوسات فكرية واقعية

بقلم: أماني موسى
إلى المواطن المصري السعيد الحزين، الهمام الكسلان، الحُر اللي أتعود ثقافة العبيد والقطعان، الكريم البخيل، المحب والكاره لحياته ولكل اللي حواليه، إلى المواطن المصري الغلبان في كل مكان من أقصى الشمال لأقاصي الجنوب في أخر البلدان، إليك يا عزيزي امتحان سهل خالص وإجاباته من واقعك السعيد المرير، وطبعًا مش مرير من المُر لا سمح الله ولكن مرير جاية من المرمر والياقوت والمرجان اللي مالي حياتك يا غلبان، واللي هيجاوب ويكسب هنديله صابونة هدية ومن غير ما يتصل على 0900 ولا يتكلف أي نقدية.

*السؤال الأول: التعبير:
أكتب ما لا يقل عن 500 سطر في الموضوع التالي
1-بعد ذبح الحكومة للخنازير انتشرت ظاهرة بيع لحوم الكلام والحمير والخنازير، اكتب من وجهة نظرك كحمار كبير أو أيًا من الحيوانات السابقة عن كيفية حل هذه المشكلة، يمكن تعرف تحل لنا المشكلة وتجيب التايهة يا فالح.

*بم تفسر أو علل (ولو ملقتش أسباب أكتب أي حاجة ومتتطلبش مني أني أفسر لأني مش عارف وإلا مكنتش سألتك يا مفتح)
- سجن الأب متياس بتهمة التزوير بينما لم يتم حتى اتهام مأذون حلوان بتهمة التزوير رغم تشابه أحداث الواقعة؟
-غضب المصري الهمام من احتراف لاعب في سويسرا ومش بيغضب من احتراف فلوس بلده كلها في سويسرا ؟
- بعد هزيمة، أقصد فشل، يووه أقصد خيبة المنتخب المصري قدام الأمريكي قدّم شوبير برنامجه واللي كان فيه خلطة فورية عبطية من إعلانات مقوية للسعادة الزوجية وآيات قرآنية وحبة كورة بالحسرة والدمعة والتقلية؟

*اختار من المتعدد ومن غير ما تفكر كتير
- سوسو الرقاصة والمغنية والممثلة إياها دي بقت حلوة في الفترة الأخيرة بسبب (عمليات الشفط، النفخ، الشد، كل ما سبق).
- الشعب المصري دايمًا يبحث عن زعيم، و ولا مرة فكر أن يصبح زعيمًا لأنه (مش بيحب يتعب ويشغل مخه، لسة هيقعد يفكر ويخطط ويشغل مخه، وأنا مالي مش عارف ومش هشغل مخي).
- أفلام الموسم كلها دم وقتل عشان (المخرج عايز كدة، اللون الأحمر طالع موضة، هناك خطة لمنع أفلام البوس والأحضان عشان عدوى أنفلونزا الخنازير يا زكي).
- ازدياد طوابير العيش والأنابيب بطول البلاد وطولها برضه لأن (دة تعذيب من المسئولين للمتسولين واللي هما الشعب طبعًا، هدف وطني حيث يقف الجميع في طابور يقولون: بلادي بلادي بلادي أين أنبوبتي و رغيفي وبوتاجازي).
- فشل المنتخب المصري أمام الأمريكي لأنه (كان بيتبع خطة "قلبنا على قلب بعض" فنتج عنها تجمعهم في أحد زوايا الملعب في حب وتآخي والأجوان داخلة فيهم الله ينور – وللا عشان المنتخب الأمريكي كان بيلعب بخطة 4 – 4 – 2 اللي ثبت نجاحها).

الامتحان قدامك أهو لو عرفت تحله هننجحك ونرقيك من مواطن درجة عاشرة لمواطن درجة عاشرة برضه والأجر والثواب عند الله.
واستنونا المرة الجاية في الجزء التاني من الامتحان عشان تاخد الصابونة كاملة يا مواطن.