هلوسات فكرية واقعية 2-2

بقلم: أماني موسى
إلى المواطن المصري السعيد الحزين، الهمام الكسلان، الحُر اللي أتعود ثقافة العبيد والقطعان، الكريم البخيل، المحب والكاره لحياته ولكل اللي حواليه، إلى المواطن المصري الغلبان في كل مكان من أقصى الشمال لأقاصي الجنوب في أخر البلدان، إليك يا عزيزي الجزء الأخير من الامتحان سهل خالص وإجاباته من واقعك السعيد المرير، وطبعًا مش مرير من المُر لا سمح الله ولكن مرير جاية من المرمر والياقوت والمرجان اللي مالي حياتك يا غلبان، واللي هيجاوب ويكسب هنديله الصابونة كاملة هدية ومن غير ما يتصل على 0900 ولا يتكلف أي نقدية.
*سؤال التعبير:
أكتب فيما لا يقل عن 200 صفحة (طلع كل اللي في قلبك يا ضنايا بس من غير غلط لأن الورق متراقب وأي كلمة كدة ولا كدة من أفاك وأنت عارف الباقي بقى) في الموضوع التالي:
بعد الحكم بإعدام هشام والسكري لاتهامها بمقتل تميم عرض أهل المتهمان دفع دية لوالد القتيلة، أكتب من وجهة نظرك كمواطن مالكش دية (لكن طبعًا ليك داهية و60 و 100 ) عن هذا الموضوع خاتمًا سطورك بكم بيت شعر في "المزة" اللي راحت بس من غير ما تعيط وحياة أبوك وخليك مؤمن، والبركة بالفضائيات اللي بتجود بـ "المزز" من كل صنف ولون.
*بم تفسر:
- العلاقة الطردية بين تأخرنا في كل المجالات حتى ع الأتوبيس وبين شعار "مصر بتتقدم بينا".
- تميم ليها "دية" بملايين الدولارات بينما آلاف الغلابة اللي راحوا في العبارة والدويقة وغيرها كان ليهم "دهية".
-ظهور علامات البله على المواطن بعد مشاهدة مطش كورة أو فيلم عربي أو أكلة فول بالسوس الطازة وزيت العربيات.
*أذكر المصطلح اللي مش علمي ولا منطقي اللي بتدل عليه العبارات الآتية:
- هي عملية دورية نهبية من كبار البلد لشفط الأكسجين وفرص الحياة من صغار البلد (طبقًا لقاعدة السمك الكبير ياكل الصغير هم هم).
- هي جلسات صلح عرفية تتم في فقط بلاد الواء واء بين الفراخ وبعضيها، وكل فرخة من اللي حاضرين القعدة مركبة عرف ديك وعاملة فيها دكر ملو ريشه.
*أكمل:
- يعاني المواطن (قاع المجتمع) من انصهار في الحر دة وعدم وجود مياه صالحة للشرب بينما قبة المجتمع يتكيفون ويشربون المياه المعدنية بسبب .......
جـ: طبيعي القاع في الجنوب وهيكون حر أما القبة في الشمال فالجو هيكون برد، مش محتاجة يعني).
- من أحد معجزات القرن الحالي .......
جـ: العيش طبعًا أو اللحمة حضرتك أو علاوة من غير ارتفاع أسعار.
- كل ما تسرق أكتر فرصتك في........ تكبر
جـ: أنك تروح مارينا أو سويسرا
* سؤال الفرفشة:
إيه هي أخر أمنياتك كمواطن غير أنك تلبس دبل قبل ما تموت وتلاقي شغل وتاكل لحمة؟