خلي الحذاء صاحي

بقلم- اماني موسى
جلس عم سعيد مسعد أبو السعد متكئاً على كرسي مكتبه المتهالك ليتصفح جرنان الأسبوع اللي فات بعد ما خلصه صاحبه سيد سكسكة وحل الكلمات المتقاطعة، فوجد عم سعيد عنوان يتصدر الجرنان وبيقول (أن مصر لم تتأثر مطلقاً بالأزمة الاقتصادية العالمية وذلك وفق تصريحات المسئولين) فانتابته نوبة متواصلة من الضحك وقال: (مشوفتش بهلونات بتضحكني أد المسئولين بتوعنا، بيكدبوا ويصدقوا الكدبة)، ياااه لو يحصل لهم زي بونوكيوا وكل ما يكدبوا مناخيرهم تطول!!!! وأهو تبقى مناخيرهم دايماً في السما علامة الشموخ بردوة.
فسأله سيد سكسكة (خير بتضحك ليه؟ ضحكنا معاك) فقاله سعيد مسعد أبو السعد: هكون بضحك على إيه غير تصريحات المتسولين بتوعنا، أما إحنا شعب صحيح ناكر للجميل زي القطط ناكل وننكر، وأسعار الدوا زي ما هي والأنسولين متوافر والخضار في السوق بأرخص الاتمان واللحمة بـ 2جنيه الكيلو والجزار كل يوم يتحايل عليا اشتري بس طبعاً أنا مش بحب اللحمة لأني اتعودت على الرومي وبس ومعدتي بتتعب من اللحمة!!!
فنظر له صاحبه بتعجب ودهشة وقاله طيب ياريت يا أخويا حد طايل؟ طيب حتى يوزعوها على المواطنين في حقن أو حتى أزايز عصير.

وهنا راحت قاطعتهم الست هنية وقالت لهم بعد كل مجلس شعب ولا اجتماع يخرجوا يقولوا لنا الدنيا وردي وبمبي وفيه شغل والعيش متوافر والشقق والجواز أخر تمام وبرة الدنيا سودا، بطل يا سعيد يا أخويا تقرا جرايد وريح نفسك أنت عندك سكر كفاية لحسن يجيلك الضغط كمان.
فقال لهم شفتوا المحكمة الجنائية عايزة تقبض على البشير والحكام العرب خايفين لحسن يجي عليهم الدور وأنا من رأيي أنهم يساندوه ويخلوا كل ستات العالم العربي يروحوا لمسجد السيدة نفيسة ويكشفوا راسهم ويدعو بصوت واحد (ربنا على الظالم) ويقف وراهم رؤساء الحكومات العربية ويقولوا بنبرة عنترية ربنا يهد المفتري آآآآمين.

راح عم فرحان الساعي قال وليه الشعب يسند الحكومة؟؟ بأمارة إيه هي أمه؟؟ ما الشعب ليل نهار بيصرخ وبيستنجد بالحكومة عشان تسمعه وتوفر له عيش كريم ودوا وأكل وشرب والحكومة ودن من طين والتانية من عجين، فضحك عم سعيد وقاله تلقي الحكومة وقعت على ودانها وهي صغيرة والسمع عندها ضعف وتلاشى، ولا تلاقي الشعب مش بيصرخ بذمة، فقالت الست هنية أحسن حاجة يصرخوا بميكروفونات صناعة صينية عشان تكون تمام وتوصل صوت الشعب للحكومة والصناعات الصينية هي اليومين دول اللي مضمونة.

واستكمل عم سعيد كلامه وقال: مفيش قدام البشير وأمثاله غير أنهم يخضعوا لقرار المحكمة الدولية ويسلموا لأن مفيش قدامهم خيار آخر، فضحكت هنية وقالتله يا ترى خيار بلدي ولا صوباط مغشوش زي اللي في السوق اليومين دول، فقال لها لا خيار مهجن ومن عيلة الكوسة الدولية كمان.
فقاطعهم عم فرحان الساعي وقال: والاهي الحل أن البشير يرفع الجزمة ويهدد بيها المسئولين زي بقية إخواته العرب، ويقول لهم والله العظيم تلاتة اللي هيقربللي هخلع الجزمة في وشه وأنا مش مسئول عن النتايج، وطبعاً هتلاقي حبة منهم هينبطحوا أرضاً من الريحة، وحبة تانيين هيفروا هاربين.
راح ضحك عم سعيد مسعد أبو السعد وقال تصدق يا فرحان دي طريقة مبتكرة عشان أخلص من زن أم العيال، أو أخلص من زحمة الأتوبيس...........
عادي في بلادي: لما تسمع تصريحات المسئولين العرب تحس أنك في برنامج أضحك كركر أوعى تكشر.