طباعة
الصفحة |
 |
د. ياسر غبريال
بقلم: ياسر يوسف غبريال
هو انت مكتوب عليك
اللى تبات فيه
تصبح فيه
ولما تجرى على الوطن
تلاقيه
فى حضن غيرك
وبيحرق كنيستك وديرك
يا وطن كتر خيرك
======
هو انت مكتوب عليك
تحلم ولا تنولش
تيجى تصلى
تقوم الدنيا وماتقعدش
تعيش خايف
وتخاف تعيش
والظلم شايف
ولا تحكيش
يا حبيبى
الطبطبة
ومصمصة الشفايف
ما تاكلش عيش
=======
هو انت مكتوب عليك
تكون ضحية اشاعة
او كلمة فى الاذاعة
واللطافة والوداعة
اللى من صفاتك
جرأوا عليك الجماعة
ارفع صليبك ويا صلاتك
مش الشياطين
بيخافوا من دى العلامة ..
======
هو انت مكتوب عليك
تكون ايوب
والمهنة مصلوب
هو طريق الجلجثة انتهى ولا ابتدا
والوطن اللى بنور المسيح اهتدى
ليه فى القبر مغلوب ..
يا وطن قوم بقى ..
ارواحنا فى هواك متشعلقة
ومستنية لحظة اللقا ..
=====
هو انت مكتوب عليك
ما تشلش حاجة للزمن
غيرك يشترى وانت اللى تدفع
التمن
جربت طعم الالم
دوق .. دوق
يمكن فى يوم تفوق
ولا استحليت المسكنة
======
هو انت مكتوب عليك
السكوت
اللى بطعم الموت
ولو طلعلك صوت
الف مين يسكتك
وسكتك
توهة و ضلمة
ولما
تقول انا مصرى
يقولوا
من اهل الذمة
======
هو انت مكتوب عليك
الإنحنا
دا سيدك انفرد عوده
فى ملء الازمنه
شايل صليبه
بارداة مومنة
بس فى ايده
السوط
بيطهر الامكنة
الصليب مش ضعف
دى قوة متمكنة
والبداية من هنا
Gobrial2003@yahoo.com
المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع
http://www.copts-united.com/article.php?A=10595&I=276