ليه بيحصل ياناس ياهوووه؟!!

< ليه يا بلد.. ليه تجاهلنا الثمن الهائل والمعاناة الرهيبة اللي عاشها أهالينا في «رابعة العدوية» و«النهضة».

 

. ليه مافيش أفلام وثائقية لها الشكل والإطار العالمي ترصد شهادات الأهالي مدعمة بوسائط إعلامية مبهرة ومؤثرة؟!.. لماذا لا يتم تكريم رموز دفعت الثمن الأكبر خلال تلك الفترة؟!.. ليه مؤسسات الطفولة وحقوق الإنسان لم تعلن الأثار النفسية والتربوية على أطفال «رابعة» و«النهضة» جراء بشاعات الممارسات الإرهابية الإخوانية المرئية والمسموعة.. وتلك المواد لو تم إعدادها بشكل تقني محترف ستكون بمثابة الرد الأعظم على من يتباكون على فض الاعتصام، وكمان تدين من تأخروا في فض الاعتصام على حساب أهالينا المساكين هناك!! 

< جماعة محظورة عملت جمعية تم فضها ووضع ميزانيتها تحت تصرف الحكومة، لكن سبحانك يارب ليها حزب موجود وشغال والحزب له جريدة وبتطلع وتنزل الشارع، والأكادة بتطبع بدون مقابل من جماعة تقوم بالصرف على مظاهرات وسلاح وبلاوي سودة.. في حلاوة أكتر من كده؟!

< يعني إيه إرهابي عتيد شارك في اغتيال بطل الحرب والسلام يترأس حزب في زمن البشاعة، ويتم توجيه العديد من التهم إليه بالتحريض على الإرهاب من منابر اعتصامات الجبن والخسة، ويهرب إلى قطر وطن الكراهية البغيضة للبلاد والعباد، ومنها يواصل تهديداته، وتوعده بالانتقام.. برغم كل ده الحزب قائم وأشاوسته يصرحون ويخرجون للجماهير عبر الفضائيات ينظرون ويوجهون حتى الأن.. إزاي وليه؟

< مين اللي فكر وقال وقرر أن يكون السكن بالمدن الجامعية بلوشي، رغم إن اللي المدن رفضتهم همه الأكثر احتياجاً للدعم، وهمه اللي مصاريفهم فوق الاحتمال (سكن وتغذية.. الخ) خارج المدينة.. إيه العبقرية المعملية الأكاديمية الفذة دي ياحكومتنا الرشيدة؟!

< إزاي وليه نسمح في جامعاتنا برفع أعلام جماعة إرهابية، والتصريح ليها بالتظاهر أصلاً.. حاجة من الاتنين يا وزير التعليم العالي.. يا ترجع في قرارات حظر الجماعة، يا تنفذ القرار على الأرض، وأخرة التوهان دي إيه؟!

< يعني إيه الناس اللي اشتغلت في قصر السلطان، ولم يقدموا استقالاتهم حتى قيام الثورة يتم عودتهم لسابق أعمالهم حتى لو كانوا في مراكز القيادة؟!

< حد يفهمني تصريح د. حسام عيسى واللي في بدايته يهون من بشاعة ممارسات الطلاب الإرهابية والطالبات العضاضات المجرمات، وفي نهاية التصريح يقول الامتحانات هيحميها الجيش والشرطة؟.. إزاي تدخل الممنوع اللي انتم شايفينه محظور وممنوع من الدخول، ولا أخيرا تأكدتم أن وجود الحرس بات ضرورة؟!

< هوه ليه مافيش حد بيتوقف عند ظاهرة بناء دور العبادة (كنايس ومساجد) على هذا النحو من الفخامة وبإسراف مبالغ فيه في بلد أكتر من نصفها تحت خط الفقر لدرجة أن بعض هؤلاء بيحرجوا يدخلوا الكنايس والمساجد السبع نجوم ويستشعرون الغربة على أبوابها ويكتفون بعمليات التسول ولا حد بيسأل فيهم من اللي صرفوا على تلك الدور؟!

< إزاي ممكن نقبل وجود ألاف القضايا المتعلقة بالتعدي على الأراضي الزراعية في بلد لديها أزمة في توفير الغذاء، ليه مافيش حزم ومواجهات حقيقية للي بيقوموا بتلك الجرائم وتعظيم العقوبة على مثل تلك الجرائم؟

< هوه ليه ماحدش بيرد علينا حوالين موقف الأحزاب السلفية في الفترة الجاية؟!.. يعني إيه جماعة تعتنق فكر ديني، يكون لها أحزاب تمارس الفعل السياسي بمخالفة كل القوانين والدساتير من أيام مبارك ومرسي ومابعدهم، وهيعملوا معاهم إيه بالظبط ولا احنا بنغسل أيادينا من الكارثة بوضع بنود في الدساتير وكفى؟!