شايفة يا مصر..؟
أماني موسى
بقلم: أماني موسى
أيوة يا مصر أن رجعت يا أمي من قعدة القهوة...... بيني وبينك زهقت يا مصر من القهوة، ومتسألنيش عملت إيه لأني طبعًا لقيت الحل وغيرت القهوة، هو أنا كنت بحكي معاكي في إيه؟؟ آه أفتكرت.
بصي يا مصر أنا أتولدت لقيت اللي حواليا بيسموني قبطي أو عضمة زرقا وساعات بيسموني أربعة ريشة (سيم يعني بينهم يا مصر) والمشكلة بقى أنهم ساعات بيعاملوني بمنتهى الشفقة والعطف كأني عندي عاهة ولا مشكلة كبيرة.
تصوري يا مصر مرة بقول لصاحبي في الجامعة أني مسيحي طبطب عليا ومشي وسابني، المشكلة الأكبر بقى أني ساعات بلاقيهم بيعاملوني بطريقة وحشة أوي وبتضايقني..... إنما بقولك إيه صحيح يا مصر هو مش أنتي أمنا وإحنا كلنا ولادك؟؟؟ ولا أنا مش ابنك عشان بيسموني قبطي؟؟
طيب تعرفي بقى يا مصر أن قبطي دي يعني مصري، يعني كدة أنا مصري وفي الصميم كمان. عمومًا يا مصر أديني اشتكيتلك أهو عشان أنتي أمنا وتتصرفي مع ولادك بقى.
بقلك إيه يا مصر ثواني هروح أقفل الشباك وأجي، لحسن ريحة كوم الزبالة اللي على أول الشارع مع الدخان بتاع العربيات خنقني.... رئتي ماتت يا مصر بس معملتلهاش جنازة لأن صدري قافل اليومين دول،،،
على فكرة بقى شوارعك اتملت بالأكوام دي في كل شارع وحارة، وبقى شكلك وحش أوي والمسئولين بيقولوا أنهم عايزين ينضفوكي فمنعوا الزبالين وبياخدوا 10 جنيه على فاتورة الكهربا، وفي الأخر بتزيدي ..... ولا بلاش أقول لحسن تزعلي مني يا أمـــــــــــي.
شفتي كمان يا أمي أزمة النيل اللي بين مصر ودول "الحوض" وقال إيه القذافي تدخل لحل الأزمة، ما تقولي لهم يا أمي يخلوهم في حالهم و"ينقطونا" بسكاتهم...... ربنا يستر ومندخلش في أزمة ميه وشرب وتنضم لسلسلة الأزمات بتاعة الغاز والأنابيب والعيش والحشيش و.....
بصي يا مصر بقى أنا لو حكيتلك عن كل اللي حاصل ومضايقني مش هنخلص كلام وبالنهاية رغم كل دة إلا أني لسة بحبك ولسة ابنك ولسة هحاول أخفف من ألمك وجرحك اللي هو ألمي يا أمي.
http://www.copts-united.com/article.php?A=18433&I=457
