طباعة
الصفحة |
 |
بقلم: سامي البحيري
قرأت أنه يتم حاليا إعتبارا من يوم السبت 9 مايو 2009 إجراء مسابقة لملكة جمال المنقبات ، ومن يعتقد أننى أفترى أو أخترع أخبار ما عليه إلا أن يضغط على الرابط التالى:
http://news.aol.com/article/saudi-beauty-pageant/467839?icid=main|main|dl1|link3|http%3A%2F%2Fnews.aol.com%2Farticle%2Fsaudi-beauty-pageant%2F467839
وقد قررت التوجه إلى مقر إختيار ملكة جمال المنقبات، وهو بالمناسبة لن يعقد فى لاس فيجاس أو مسجد سيدنا الحسين، ولكنه عقد الرياض، تحت إشراف خضرة المبارك، وهناك 200 متسابقة فى تلك المسابقة وهى الأولى من نوعها. ولقد صرحت المسئولة عن المسابقة بأن الهدف هو تشجيع الجمال الروحانى وليس الجمال الحسى، وفور ذهابى إلى الرياض إلتقيت ببعض المتسابقات وأدرت مع بعضهن حوارات صحفية، وإليكم موجز بتلك اللقاءات:
- أتعرف بالأخت؟
- الأخت سكينة
- أهلا وسهلا إخت سكينة، ممكن أعرف بتشتغلى إيه؟
- أنا طالبة فى الجامعة
- وياترى سمعت عن المسابقة دى فين؟
- سمعت عنها فى الإنترنت وتحديدا فى مجموعة منقبات الفيس بوك
- وياترى إيه فرصتك للفوز بملكة جمال المنقبات؟
- الحقيقة أنا فرصتى كبيرة جدا زى ما إنت شايف لأنى جميلة جدا وجسمى رشيق وكمان عيونى جميلة وعلى درجة عالية من الأخلاق
- الحقيقة أنا مش شايف قدامى غير جوز عيون جميلة أما باقى المؤهلات فهى غير ظاهرة.
- لكنك ممكن تتخيل
- آه ممكن أتخيل زى الشاعر إللى قال :
كعب الغزال يامتحنى بدم الغزال
ما تبطل تمشى بحنية ليقوم زلزال
- الشاعر قصده إيه؟
- إتهيأ لى الشاعر ما كانش شايف من فتاته سوى كعب رجلها، لكن الباقى كله كان متغطى، والظاهر كمان أنها كانت ماشية بدلع و (حنية) فخاف على الأرض أن يحصل لها زلزال نتيجة هذا القدر من الحنية!!
- ده كلام جميل قوى، آدى الخيال و لا بلاش.
- أتمنى لك حظ سعيد فى المسابقة، وياترى الجائزة الأولى إيه؟
- الجايزة الأولى هو مايوه شرعى من تصميم إيف سان لوران
- إن شاء الله يكون من نصيبك
- يسمع من بقك ربنا.
****
ثم إلتقيت بمتسابقة أخرى:
- أتعرف بالإخت
- بنت الفيوم
- إسمك فى شهادة الميلاد بنت الفيوم
- لأ طبعا ، ده إسمى الحركى
- طيب وإنت من الفيوم
- لأ أنا من الإسكندرية من محرم بك
- طيب ليه سميتى نفسك بنت الفيوم
- للتمويه عشان ما حدش يعرف إنى مشتركة فى المسابقة
- حيعرفوا إزاى، ده إنت لو إختى برضه مش حأعرفك
- أهو برضه زيادة إحتياط، لأن لو أهلى عرفوا إنى مشتركة فى مسابقة جمال كانوا قطعونى
- وياترى مين ممول رحلتك من الإسكبدرية لغاية هنا؟
- دول جماعة عندنا جنب بيتنا فى محرم بك فى جامع السنية، بيقولوا عليهم الجماعة "المحظوظة" وكل شوية يقبضوا عليهم، لكن ناس طيبين قوى قالوا لى لو إتنقبتى حنديكى ألفين جنيه ونسفرك الرياض تشتركى فى مسابقة، وهم جابوا لى التأشيرة والتذاكر وكل حاجة (ربنا يعمر بيتهم)
****
- إسم الإخت
- سنية البرعى
(وكان الصوت غليظا، ومن رابع المستحيلات أن يكون صوت سنية ، ولكنه يبدو صوت برعى)
- إنتى متأكدة إنك سنية
- أيوه طبعا أنا سنية بس أهلى بيدلعونى ويقولى لى :زكريا!!
- إنا أشك إنك واحدة ست
- وعندما رفعت "سنية" ذراعها لتحية إخت من الأخوات ظهر شعر فى نهاية كف اليد خلف الجوانتى فتيقنت أنها ليست سنية ولكنها بالفعل زكريا
- إنت راجل مش كده؟
- إستر على ّ الله يسترك
- وإيه إللى خلاك تعمل فى نفسك كده
- أنا لقيت فرصة أشترك، وأنا واكل شارب نايم طول فترة المسابقة، ومش بعيد أكسب المسابقة
ثم أطلق ضحكة فاجرة لا تنم إلا عن حشاش محترف
- إزاى تكسب المسابقة إنت إتخبلت فى مخك
- - والنبى صدقنى ولا حد واخد باله، حيعرفوا إزاى، أنت مش واخد بالك إنى مكحل عيونى، هم فى الآخر حيختاروا واحد ة عينيها حلوة، وأنا زى ماأنت شايف عينيا حلوة، ألا بالمناسبة يعنى إيه جمال روحانى وجمال حسى، فالقينا هنا كل شوية يقولوا المهم الجمال الروحانى .. الجمال الروحانى ومش مهم الجمال الحسى، أنا سمعت كلمة روحانى دى فى إغنية من أغانى عبد الوهاب القديمة، لما كانت بتقول له (حكيم روحانى حضرتك) .
- ده إنت عينيك يندب فيها رصاصة ، ماتخدش فى بالك بموضوع الجمال الروحانى والجمال الحسى ، ومش خايف صوتك يفضحك؟
- إللى بياخد باله، بأقولهم إنى عندى إلتهاب فى الأحبال الصوتية
- الله يخرب بيتك
- ما تجيب سيجارة بقى، خليك جدع
samybehiri@aol.com
نقلا عن موقع ايلاف
المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع
http://www.copts-united.com/article.php?A=2904&I=78