طباعة الصفحة

إلي ذمة الله يا وطنية

شريف منصور

بقلم: شريف منصور
وطنية ليست مرات خالك أو بنت عمك وطنية ليست شخصية وهمية في ملحمة الدندورمة او بنت فلاحة او بنت فلاح في فيلم من أفلام الراحل يوسف شاهين.
وطنية هي روح مصر اللي قتلها أعداء مصر.
من قتل وطنية ومشي في جنازتها وقال بفمه المليان إلي ذمة الله يا وطنية؟
القائد العظيم اللي قال ارفع راسك يا أخي لقد انقضي عهد الظلم وسكت ونسي يقول انقضي عهد الظلم وحل من بعده عهد الذل و الهوان.
اللي قال الغني يبقي إقطاعي و ألحرامي قاضي ، قالوا  القانون ملهوش وجود واحنا القانون و القاضي و الجلاد .
اللي قتل وطنية هو كل من وقف علي منبر ينادي بسرقة أو قتل مصري لانه كافر واللي قتل وطنية هو اللي قال انت اقل مني وانا سيدك اللي قال مش من حقك تبني كنيسة ولكنك تقدر تبني بار ومرقص وخمارة  و اللي قتل وطنية هو كل جبان رضي ويرضي علي كل هذا الطغيان.
جبان وندل وخسيس كل من قال انا مالي ياعم خليها تخرب، خليني في حالي، ووقف يتفرج علي وطنية وهي بتصرخ وتستغيث و الكلاب تنهش عرضها عيني عينك في وضح النهار.
"وطنية" روح مصر ماتت ومن خسة الناس  واقفين يتفرجوا عليها.
تسال الناس  تقولك وطنية مين اللي انت بتتكلم عنها مفيش حاجة اسمها وطنية لا شفناها ولا سمعنا عنها يبقي ماتت أزاي يا عم أنت؟ لا سمعنا عنها في راديو ولا شفنا عنها حاجة في تلفزيون و في المدارس اخفوها عننا وحطوا بدلها هوس ديني ، لو سالت كبيرها او حتي اصغر واحد فيها عن وطنية ،  يقولك مين هي وطنية ميعرفوش مين هي ؟؟؟ صحيح عندكم حق ، وطنية بعد ما اعتدوا عليها وهتكوا عرضها سجنوها وعذبوها وجوعوها وأخفوها عن عيون العالم من سنين و نزعوها بجدارة من قلوب الناس . ماتت وطنية وريحتها طلعت فرموها في الشارع  اللي قتلوها قالوا ماحدش يعرف مين دي ومين اللي قتلها ؟ نظام جبان قتل القتيل ومشي في جنازته.   إلي ذمة الله يا وطنية ألف رحمة ونور عليكي يا مصر.

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع

http://www.copts-united.com/article.php?A=4835&I=131