طباعة الصفحة

آه يا زمن

زهير دعيم

بقلم: زهير دعيم
آه منك يا زمن
عَضّيتنا بنابَكْ
وقفّلت في وجوهنا بوابك
ورميتنا خلف الجبالْ
بلا هوّية، بلا موّالْ
عَ دروب لا هي دروبْ
والسّما معكّرة
والقمر معصوبْ
ونجوم عم تبكي
عَ شي حلم بيذوبْ

لا تتعب يا قمر
بتنادي ما في حدا
صار الاخو بها الأيام
لخيّو عِدا
وتفرّقت القلوب
والمصلحة دين صرنا بنعبدو
بنحرق أرواحنا بخور
جوّا معبدو

آه منك يا زمن
وين أيام الهنا
وين طلاتو؟
وين الطّابون الحلو
وين خبزاتو؟
والأبريق على الاسكملة
تغنّي ميّاتو!!

ما أحلى القعدة سوا
 بليلة ربيعية
والربّ حامي الحِمى
ليْليّة، ليلية
بيسهر علينا من فوق
بنظرة حميميّة
يلّلا نرنّم ونحبّ
صبحيّة وعصرية
تتعود البلد من جديد
بالإيمان مضوية

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع

http://www.copts-united.com/article.php?A=887&I=25