فيديو .. مرحبا بإخوتنا المسلمين .. كنيسة مارجرجس بالإسكندرية تستقبل الطلاب بقاعة مكيفة يمكنهم فيها الدراسة وقت انقطاع الكهرباء : المبادرة تخدم كل اولادنا

قامت كنيسة مارجرجس بالإسكندرية بمبادرة إنسانية، للتخفيف عن طلاب الثانوية العامة، بفتح ابوابها لهم للمذاكرة وقت انقطاع الكهرباء .

 

وبحسب تقرير مصور للعربية، استقبلت الكنيسة الطلاب بعد ان هيأت لهم قاعة مكيفة يمكنهم فيها الدراسة في ظل الحرارة المرتفعة.

 

وقال الاب رويس مرقص كاهن كنيسة مارجرجس بغبريال :" جاءت فكرة المبادرة بهدف تهدئة اعصاب الطلاب فترة الامتحانات .

 

وتابع :" قررنا فتح قاعة مكيفة لطلاب الثانوية العامة للتخفيف عنهم بعد معاناتهم من التوتر العصبي في ظل ارتفاع الحرارة ما يشكل اعباء اضافية عليهم. 

 

موضحا :" جت الفكرة مع بعض الخدام في الكنيسة اننا نفتح قاعة مجهزة مكيفة بحيث الطالب يجي يذاكر فيها اثناء انقطاع الكهرباء .

 

كما اوضح :" هنشغل المولد اثناء انقطاع الكهرباء، وميهمناش الفلوس ، المهم الولاد يذاكروا ويلاقوا جو مريح ليهم يقدروا يراجعوا فيه المواد.

 

وتابع التقرير :" فتحت الكنيسة أبوابها لجميع الطلاب وعينت لهم مساعدين لراحتهم وتنظيمهم.

 

وأكد الاب رويس مرقص كاهن كنيسة مارجرجس بغبريال ان المبادرة تخدم كل اولادنا الطلاب.

 

موضحا :" بنت طالبة قالتلي معايا زميلتي مسلمة قولتلها مرحبا بيها تيجي تذاكر.

 

وتابع :" ولادنا كلهم مصريين يهمنا نريحهم في امتحاناتهم، يهمنا نقف جنبهم نساندهم ونشجعهم.

 

 

-الناس دي جميله اوي بجد ودي مبادرة تستحق التقدير والاحترام شابوه لكل قلب نضيف ولكل قلب قادر يحس بالولاد دي وبتعب اهلهم طول السنه بالنجاح أن شاء لكل اخواتنا في الثانويه العامه ربنا يكلل تعبكم بالنجاح والمجموع الكبير أن شاء الله .

 

-ايه الجمال ده مصر جميله  بناسها الطيبين.

 

- مصر طول عمرها جميلة باقباطها.

 

اكيد مصر جميله بكل ناسها أقباطها ومسلميها وكل القلوب الجميله النقيه مهما كان عقيدتهم ربنا يحفظها ويحفظ ناسها يارب.

 

-مصر جميلة اوي بالناس اللي بتحبها فعلا ....مسيحيين او مسلمين.

 

-أصلا إتعممت خلاص فى كنايس كتير فى إسكندرية ... فكرة أكثر من رائعة و كلها محبة و تقدير.

 

-ربنا يكرم القائمين على الكنيسة ويوفق طلاب الثانوية العامة.

-شكرا للكنيسة على هذا العمل الإنساني الراقي.

 

-فيها حاجة حلوة

-كل الكنايس عملت كده تعيشى ياكنيستى دايما ام حاضنه ولادها فى كل زمان ومكان وفى اى ظرووف.

 

-مصر عظيمه تحيه الوحده الوطنيه ربنا يحفظ مصر واهل مصر.

 

-بارك الله فيكم مثال للناس اللى بتفكر بإيجابية . مش الناس اللى قاعدة تولول وخلاص.

 

-ربنا يجازيهم خير ..وربنا مع أولادنا بأذن الله.

 

-سوف تظل مصر ووحدتها بشعبها مثال يحتظى به فى الشدائد ومعلمة وملهمة للعالم ، فيها حاجة حلوة ، فيها طيبة وحنية ، فيها شعب أصيل.

 

-هذه مصر وطيبة شعبها ووحدتها..تحيا مصر..تحيا مصر ..تحيا مصر.