فيديو.. مدرس اقتصاد منزلي: 3000 جنيه تكفي الأسرة طعام وشراب.. وتثير غضب المصريين.. معلقون: قاصدين يغيظونا ويفرسونا.. يدوب يجيب فول وطعمية ده لو كفى

كتب - محرر الاقباط متحدون ر.ص
أثارت الدكتورة روضة حمزة، مدرس الاقتصاد المنزلي بجامعة حلوان، غضب المصريين بتصريحاتها التي قالت فيها ان  3000 جنيه تكفي الأسرة المصرية طعام وشراب.

وكيف يمكنها قول ذلك، وكيلو اللحم يباع بـ 400 جنيه، والدجاج البانيه بأكثر من 200 جنيه؟! ، بالإضافة إلى ارتفاع سعر الخبز في مصر وايضا الفول والطعمية والبقوليات عموما، كما أن إيجار السكن  في المناطق الشعبية فقط يتجاوز 2000 جنيه، وان تحدثنا عن  أسعار الأدوية فشهدت هي الاخرى ارتفاعًا كبيرا ، وفيما يخص مسحوق الغسيل يباع ايضا بسعر مرتفع بأكثر من ٢٠٠ جنيه ولا يكفي الشهر .

قالت مدرس الاقتصاد المنزلي بجامعة حلوان، خلال  برنامج "لعلهم يفقهون"، المذاع على قناة dmc :" بالمبلغ ده هنجيب احتياجات الأسرة :  435 جنيه اساسيات الخزين، 115 جنيه منظفات، 700 جنيه مشتريات من السوبر ماركت، 1100 جنيه للحوم والدواجن والأسماك، 650 جنيه للخضار والفواكه.

استنكر هذه التصريحات وراها بعيدة تماما عن الواقع  المفكر والطبيب خالد منتصر ، وكتب عبر حسابه على فيسبوك ساخرا :" يا بلاش ب 3000 جنيه بس حتاكل شهر ونص لحمه وسمك وفراخ،  بس بشرط في أول الشهر تقرا سورة قريش البركة حتحل ع الأكل والبساريايه حتبقى حوت وصباع الكفته حيبقى خروفؤ شاشة تأخذك إلى الجنة وفضائية تغنيك عن الحاتي!!.

مضيفا في تعليق :" أتحدى لو دخلت أي مطعم انت وعيلتك ودفعت اقل من تلات تلاف.

كما سخر عدد كبير من رواد التواصل من هذه التصريحات ، وكتب حساب :" حددى نوع العملة يا دكتورة.

ومن بين التعليقات :
-طب بالنسبة للمية والكهربا والغاز والامراض اللي بناخدلها ادويه هنستلف فلوس الشهر اللي بعده ولا ايه النظام ؟.

-نسيتي الكهرباء والغاز وعلاج الأطفال
واللبس ومصاريف المدارس عارفه  انا هدعيلك  ربنا يهديكي.

-٢٨  مينى باص رايح جاى و٢٥ فطار اقل ساندوتشين فى ٢٢ يوم لو بياخد جمعة وسبت إجازة ومش بيركب مواصلة تانية ب ١١٦٦ لو اجازة جمعة بس ١٣٧٨
١١٠٠ لحوم ودواجن واسماك ال ٣
انى كوكب ده ! .

-ربنا يديكي 3000 جنيه كل شهر ما تلاقي غيرهم نشوف هتعرفي تعيشي بيهم ولا لأ.

-انا بقول كل واحد يضاعفلها المبلغ وتأكلنا لحمه وفراخ وسمك وكااافة المصاريف العاديه التي لاغنى عنها لكل بيت من الآلف للياء.

-3000 جنيه مصرى يدوبك تقضى أساسيات البيت لمدة أسبوع ونصف فقط.

-هما قاصدين يغيظونا ويفرسونا لكن هيهات.....حلوة هيهات دى؟ .

-صحيح البركه من عند ربنا لكن فى الغلا دا ٣٠٠٠ يكفوا شهر ونصف ولحمه وفراخ كدا قصدها ٣٠٠٠ دولار بس نسيت وقالت جنيه.

- المبلغ ده يدوب فطار فول وطعمية للشهر ولو كفي في البيت مش محل.

-هى الناس دى عايشة معانا فى البلد وشايفين الاسعار شكلها ايه ولا هما عايشين في مصر غير مصر اللى احنا عايشين فيها ! .

-المفروض بعد الكلام ده يشوفوا بتاخد كام مرتب ويخصموا الزيادة عن ٣ آلاف.

-ال ٣٠٠٠ آلاف يأكلوا فرد او ٢ علي الأكثرية وجبة في اي رستورون.

-مافيش الكلام ده ... ده ضحك على الدقون من ناس مش عايشة معانا.

-يا جدعاااان بس بقى احنا ماشيين بعلاج وربنا إللي هو مش موجود في بنود الدكتوره نوهائي , حد يبس الناس دي ويقولهم بس بطلوا تستفزوا الناس
اتبسوا  بليزز.

-إزاي تعيش بـ 3000 في الشهر؟  دكتورة  روضة حمزة مدرس اقتصاد منزلي بجامعة حلوان  جابتلكم  الحل  حد  خد باله  من كلمه دكتورة  دي ...لا  واقتصاد منزلي  انا  مني  لله  اللي  عملت  باقة  وفتحت  فيس  عشان  اشوف بوست  مستفز  زي  ده.

-يا ريت القناة تقوم بتخفيض راتب الشيخ الجندي لهذا المبلغ وليرينا تجربته العملية.

-هي  جايبه الثقه دي كلها من فين ؟!.

يارب يكتب عليكي ال 3000 ج ويكون هو رزقك ودخلك يارب العالمين .

-أنا بطالب ان مرتب الست دي يكون ٣ الاف جنيه.

-عندها حق ده لو هناكل عيش حاف بس ونلغي الكهربا ونعيش في كهوف.

-حسبي الله ونعم الوكيل فيكم علاج ونور وغاز وعيش ومواصلات كل ده غلي نعيش ازاي خلينا ساكتين ولا تدوسه علي الجرح حرام عليكم.