خالد منتصر : مافيش سياحة حتنجح وغالبية الشعب بيتعامل مع السائح على إنه جاي يتربى أخلاقياً هنا وينطق الشهادتين

قال المفكر والطبيب خالد منتصر :" رئيس الوزراء قال ان أهم حل لأزمة الدولار  هو في تشجيع السياحة بعد زيادة تحويلات الخارج، السؤال هل فيه جهود لجعل شعبنا شعب سياحي؟! عندنا أعظم أماكن سياحية في العالم ، لكن للأسف ما عندناش شعب سياحي، أو بالأصح ما فيش مجهود بيبذل لتربية  مواطن عارف ان السياحة  هي أكل عيشه هو وأسرته.

 

 

مضيفا عبر حسابه على فيسبوك :" المجهود ده مجهود فكري وثقافي واجتماعي، ما فيش سياحة حتنجح وغالبية الشعب بيتعامل مع السائح على إنه جاي يتربى أخلاقياً هنا وينطق بالشهادتين!!، بداية من أول ما يدخل  طيارة مصر للطيران ويلاقي دعاء الركوب ومنع الكحوليات  !!، هو ثقافته  يشرب خمور ، انت مش عايز انت حر ، لكن مش حر انك تحرمه منها أو تصعبها عليه ، وما يلاقيهاش إلا بصعوبة في فندق خمس نجوم !.

 

 

واضاف :" ما فيش سياحة حتنجح والمرشد السياحي بيشتغل داعية ويقول الإله آمون رع أستغفر الله العظيم!! ما فيش سياحة وأصحاب الجمال والأحصنة مبهدلين الهرم روث وضحيج!!، ما فيش سياحة والمصريين بيبصوا ع البكيني والشورتات بتاعة الستات الأجانب بنظرات مقتحمة وغير بريئة!!،  

ما فيش سياحة  والكل عايز ينهش السائح بأسعار فلكية بداية م السواق لبياع التماثيل الفرعوني ، لتجار خان الخليلي، لصاحب كشك الحاجة الساقعة …الخ .

 

واختتم :" بداية نهضة السياحة تثقيف المصريين سياحياً وصناعة مواطن يعشق السياحة ويدلع السائح ويعرف إن وظيفته يمتع ويفرح ويبهج السائح ويقدم له مصر جنة ، مش يدخله الجنة اللي في السما  .