محمد ابو قمر يشيد بابتكار د.مجدي يعقوب الجديد : الراجل ده مركز بحوث علمية لوحده .. يعالج كل المرضى دون النظر إلى الدين

أشاد الكاتب محمد ابو قمر ، بالإنجاز الذي يقوده  البروفيسور السير مجدي يعقوب، جراح القلب المصري العالمي، والذي يتمثل في  تكوين صمامات قلب تنمو طبيعيا داخل الجسم.

 

وكتب ابو قمر عبر حسابه على فيسبوك :" لما حد يسألني عن مصر ، يعني لما حد يحب يعرف مني يعني إيه مصر لازم وأنا بجاوبه أتكلم عن مجدي يعقوب ، لأن الراجل العظيم ده علامه من علامات البلد دي دلوقتي ، هو امتداد لتاريخها العظيم ، هو حفيد المصري العظيم أستاذ ورئيس قسم التحنيط.

 

 

مضيفا :" لو بصيت في وش مجدي يعقوب وشوفت طوله وعرضه وبسمته العريضه هاتفتكر علي طول الأجداد العظام إللي هندسوا الأهرامات وفننوا الآثار المذهله...تماثيل.....معابد...مسلات...قيم ومباديء ومثل إنسانيه....وتاريخ من العمل والإبداع  .

 

 

لافتا :"مجدي يعقوب مش مجرد طبيب ، وكلمة عالم صغيره جدا عليه ، الراجل ده كلية طب لوحده ، مركز بحوث علميه لوحده ، جامعه لوحده ، مصر مليانه كفاءات ، مليانه علماء حقيقيين مبيتكلموش كتير ، مبيتكلموش خالص ، بيشتغلوا بس غير هؤلاء إللي نصبوا أنفسهم علماء وقاعدين يكلمونا عن الجن والعفاريت ونكاح الصغيرة وكيفية دخول الحمام ونفاس المرأة وشكل ملبسها وحجابها ومشروعية ضربها .

 

 

وتابع :" شوف الفرق بين مجدي يعقوب إللي بيشتغل دلوقتي علي ابتكار جديد هاينقل تعامل الأطباء مع قلب الإنسان نقله مذهله وبين الشخص إللي بيقولوا عليه أعلم أهل الأرض وهو كل إللي يعرفه إننا لازم نغزو الفرنجه ونقتل رجالهم ونستولي علي نساءهم وعيالهم ونفتح سوق للنخاسه نبيع ونشتري فيه الستات والعيال وننكح ما ملكت أيماننا منهم.

 

 

 

وواصل :" شوف الفرق بين مجدي يعقوب إللي بيجاهد طول عمره لعلاج الناس من غير ما يسأل إللي بيعالجه دي مسلم ولا مسيحي ولا يهودي ولا بوذي وبين الإمام إللي حرم علاج مريض الفشل الكلوي واعتبر علاجه حرب معلنة علي الله وعلي الاسلام، في فرق كبير بين إللي بيصادروا وعينا وبين إللي بيرفع إسمنا وإسم البلد للسما وهو بيشتغل في صمت وكله تواضع لا كفّر حد ولا قال فلان هايدخل الجنه وفلان هايدخل النار.

 

 

واختتم :" مجدي يعقوب بيمثل شرفنا وعزنا وكرامتنا وتاريخنا المليان بالعلم والفن والقيم الإنسانيه النبيله.