خالد منتصر : المصروف على الفتاوي ألف ضعف المصروف على المعامل .. ودكاتره اشتغلوا فقها ولبسوا العمة والجلابية بدلاً من البالطو الأبيض !

قال المفكر والطبيب خالد منتصر :" كيف تعلم أن عقل هذا البلد يسير نحو الهاوية؟، الاجابة :" لما تلاقي المصروف على الفتاوي ألف ضعف المصروف على المعامل، ولما تلاقي مخرج شاب بيقول ان سبب عدم زواج البنات إنهم بيربوا قطط.

 

مضيفا عبر حسابه على فيسبوك :"لما  تلاقي الناس بتهاجم أفضل لاعب كرة قدم في العالم ابن بلدهم لإنه اتصور جنب شجرة عيد ميلاد في بيته،  لما تلاقي الشباب بيمدح في ويصفق ل شاب ذبح بنت رفضت  تتخطب له، معجبين بيه لإن البنت مش محجبة، لما تلاقي ابن بلدك معجب بالحوثيين وبيقول عليهم مقاومة اسلامية ، وهما بيخسروا بلده مليارات وقافلين له شريانه المائي الرئيسي.

 

 لما تلاقي واحد بيجري عشان يلحق المترو، فوجد قدامه كشك الفتوى، وكان محزوق في  سؤال مهم، مجدي يعقوب حيخش الجنة ولا النار؟.

 

•لما  تلاقي ناس متخيله ان  بعد خلق ال ٢٠٠ مليار مجرة صارت المهمة المقدسة الكبرى هي مراقبة خصلات الشعر الظاهرة والمكشوفة من تحت طرح البنات ،  وأن السماء قد تحولت لمصمم أزياء.

 

واختتم :" لما تلاقي الدكاتره اشتغلوا فقها ولبسوا العمة والجلابية بدلاً من البالطو الأبيض، وبدأوا يتكلموا عن ان صلاة الفجر بتشفي الجلطة ، وان الاعتكاف بيشفي الصداع، وإن الرقية الشرعية بتشفي التبول اللا ارادي.