" دعوهم يرقصون ، يهتفون  فلم يتبقى لهم غير الغناء والكثير من الضحك.."

*الناس  ها تنتخب السيسي بكل قوة وإصرار من غير بلبلة أو تشكيك ،الناس ها تنتخب السيسي  مش علشان التنمية والتعليم والسياحة والأمن والصحة وكشف الحقائق وكل  الكلام الكبير دا  ولا حتى أي برنامج يفرق معاهم ولا ها يعرفوا فيه حاجة .الناس ها تنتخب  السيسي علشان  لقت حد  حن وطبطب على وجعها ، حد احترم أحلامهم البسيطة ومسخرش  من تعبيراتهم العفوية  بزغروطة ورقصة وصقفة بالكفوف  ولا حد اتكبر على  ثقافتهم المتواضعة في كلام مش مترتب أو  فصيح  لكنه من القلب خارج كدا ، حد عارف كويس  هم عايشين فين وإزاي وشاكرين ، حد حس بألمهم وغربتهم  وخوفهم وتحدياتهم ودفعهم للثمن كل الوقت ، حد يحتموا بثقة فيه، حد تنام الناس على حسه بعد  ما هدتهم سنين عوز وتعب و خوف وتهديد من  شوية مخابيل على مساطيل على تعاويذ  ، بالمختصر كدا حد صدقوه وهم متأكدين أنه فعلا  بيحبهم وقادر ينضّف أيامهم  من كل فاسق، فاسد ، كذاب ومنحط وجبان ، وبعد كدا  أي حاجة تانية أو أي مشاكل  تهون وعلى رأي المثل لاقيني ولا تغديني . ناس كتير أوي كانت عايزة شفيق ويفضل السيسي بهيبة مكانه لكن اللي حصل غير كدا ، السيسي  لقى الناس، لقى مصر تايهة في الشوارع  غرقانه في دمها ، وكل من هب ودب وكل اللي مايسواش يلطش فيها شوية ، ماحدش رحم دموعها  ولا رأف بكسرتها ولا حتى خد بإيدها وقت ترويعها وسرقة قوتها  وضناها ومخدتها ، السيسي عمل كدا وقال stop لحد كدا ، الراجل بكل تواضع اتنازل عن البيادة علشان هم مايمشوش حافين، فيه أروع من كدا  ، تفتكروا الناس عايزه  حسابات في البنوك   ولاّ طمعانة تسكن ف قصور ولاّ تتعلم ف الخاص ولاّ يمكن عايزين يصيفوا كل موسم في مارينا ولاّ بلاد بره كمان .. أبدا ..

الناس في مصر بالذات دون عن أي شعب على وجه الأرض  بيكون أقصى طموحهم الستر ولمة العيلة والجيرة بضحكة  وهناوة بال  ، الناس في البلد دي حلوين  أوي أوي ،  بيعرفوا ازاي يسرقوا من قلب الضلمة مشاعل  فرحتهم ، مع أول فرصة  يخرجوا للشوارع  ، في فوز مباراة  ، في عيد ، في زفة ، حتى في عز الحر الكل يخرج للشوراع  والسهرة  للصبح ، يامحلا الذرة المشوي والترمس والفطاير على الكورنيش ، شعب يموت في الضحك، يعشق الحياة مهما كانت امكانياته  ولما تطيب خاطرة ينسى بسرعة الأسية  ، تلاقي المصري  في بيته كذا علم ويمكن ظروفه ماتسمحش  لكنه يفتخر ويرقص ورايح يشتريه تاني وعاشر ، بالحبر الفوشيا يجري يكتب أغنيته بطول النيل والحلم ، من أول الصعيد لبورسعيد  من الإسكندرية لسوهاج لقنا  يتفاءل ويهلل بأبسط بشرة خير- وبأعلى الصوت يهتف بتحدي كدا واعتزاز بمصريته  ،  وبعدين يطلع في المقدر  شوية متاعيس  يستكتروا عليه الرقص والغنا  يعني هيه الكعكة في إيد الشقيان عجبة .؟ شعب لما يحب ..يكسر كل الحواجز ويقولك أدخل يامحبوب بتقلك  وف القلب والننّ اتربع  ، شعب  مش عاوز غير  اللي يحترمه ، يحترمه بجد ويقدر تعبه وصبره وتضحياته ،بالذمة مش إحنا  شعب  لقطة ..! يا بختك يا مصر بناسك المذهلين اللي بهروا العالم كله ولسه ..

*  افرضي النتيجة جت  عكس  ..!

* معقول بعد ثورتين ودم وفوضى  نرجع من تاني لنفس القيء ،لاء لاء  مش معقول  المفروض اتعلمنا واتكوينا  كفاية ، وبعدين  دي مصر ودا شعبها الحكاية ..!   ، مافتكرش حد هاينام لحد إعلان اسم رئيس مصر الآتي ..

حتما  الآتي أفضل وأجمل   وأملنا كبير