بقلم: مرقس كمال
(بالآلم والوجع بنرجع بشر ونقترب من الانسانية )

(1)
لو الوجع انسان هجادله وهناقشه
ليه حفرت رسمك فى قلبى وبالدموع ناقشه
انا بطردك بسلام منحة تفوق كل عقل
بصد بيها الآلم وسهامه ومناكشه

(2)
فيه كلام ردئ يوجع بيتحول بخار
وكلام يداوى يطبطب ويشدد قلب خار
كل كلامك مرايا مرسوم فيها فكر قلبك
لو يتنقى هتنطق بالمجد والافتخار

(3)
مقدرش أقول ياريتنى معدوم من الاحساس
أو أكون رقم عايش معدود ما بين الناس
هى الحياة تسوى من غير قلوب بتحب
همسك فى الحب حتى لو خلى قلبى مداس

(4)
يا حب صادق وحدك تقدر تبلع جفاء
لو فى العلن متشاف أو أكتر فى الخفاء
كله هيفنى وتفضل بنقاوتك للأبد
هيشيدوا بيك لكن بعد رحيل واختفاء

(5)
دى البذرة لاجل ما تطرح بتندفن وتموت
وعشان ثمرها ينضج سنين كتير بتفوت
مين فينا لما قطف راح يوم شكر بذرة
لو حبك بذرة حية هيشبع كتير ويقوت

(6)
ونقط ع الارض تنزل يبلعها التراب
عنين بتنزف وجع او توصف قلب تاب
دموعك عند البشر ملهاش تمن لكن
ربك حافظها وبيها يفتح لك الف باب

(7)
ايوه الوجع ده علامة انك بقيت انسان
القلب بحب يفرح مع نعمة النسيان
ودموع وصرخة وسجدة وكتابة او ابداع
دى هبات ربك تحرر من لوعة الكتمان

(8)
هتقضى مستقبلك ندمان على اللى راح
حابس نفسك فى ذكرى وخسران البراح
لأ خد م الماضى خبرة تخلى الجاى احسن
وشوف كام مرة ربك ضمد لك جراح

(9)
افرح عشان بالنعمة فوق الوجع مرفوع
وخلاصك تمنه دم على الصليب مدفوع
وروح جواك بيسند ويعزى ويشدد
وحصن تحتمى فيه وبرج اسم يسوع