هند مختار
¬فاكرين أيام الثورة من أربع سنين ؟ فاكرين يوم جمعة الغضب ؟ ساعتها التلفزيون المصري كان بيذيع أفلام وحاجات عادية كأن مافيش حاجة بتحصل ، وقتها كان الريموت في أيد المصريين بيتنقلوا بالريموت بين قنوات العربية والجزيرة والبي بي سي علشان يعرفوا الأخبار ..

ساعتها كان كتير من الإعلاميين بيشتغلوا في التلفزيون المصري ،وكان فيه أسماء ماحدش يعرف عنها حاجة ، فجأة الإعلاميين دول بقوا ثوريين لما اكتشفوا إن الثورة أكيد ناجحة؟

مش ده المهم المهم بقى إن الإعلاميين دول بعد كده ظهروا في قنوات جديدة فتحت فجأة وبدأوا يقولوا أرائهم ويوجهوا المشاهدين على حسب ما هم عايزين ،وبقه في أسماء غريبة بتطلع في التلفزيون على اعتبار إنهم محللين وخبراء وحاجات غريبة كده ،ووجهوا الناس لانتمائتهم السياسية وخير دليل انتخبوا (مرسي)..
نفس الإعلاميين دول ماقدروش يستمروا ومشوا مع الناس اللي قررت إنها تسقط نظام الإخوان اللي هم روجوا ليه ..

بعد كده تحول الموضوع لإهانة الشباب اللي اشتركوا في الثورة وادعوا إنهم (نشطاء السبوبة) ،وبدء موسم التخوين لأي شخص قد يختلف في وجهة النظر ،وبدأت المزايدات ..

من المؤكد إن فيه ناس فعلا كويسة من الإعلاميين ،وفيه ناس كويس من الشباب الثوري ،والعكس صحيح.

مش هي دي الأزمة الأزمة الحقيقية في فكرة الطباخ اللي بقه إعلامي ، والمعلق الرياضي اللي بقه إعلامي ..إلخ ..

الإعلام بقه سبوبة كبيرة جدا الشاشة وسيلة ربح جيدة جدا بعيدا عن المهارة والدراسة والخبرة .

من أصدق القنوات في الإعلام عموما قنوات الطبخ ،وقنوات ال.. ولا بلاش . .جميعنا نشترك في جريمة التضليل.