محمد علاء، المسئول بإحدى الجمعيات الخيرية، تحدث عن فكرتهم بأن الطرق التقليدية فى تقديم التوعية للمواطنين بخصوص أى مرض صارت لا تجدى نفعاً، خصوصاً خلال الشهر الكريم، لذا فكر ومعه مجموعة من زملائه من أبناء المدينة فى حل مختلف وهو «أوتوبيس» يمر فى شوارع المدينة وينقل المارة لأى مكان يريدون الذهاب إليه مجاناً: «قمنا بتزيين الأوتوبيس من الخارج بألوان جذابة حتى يلفت انتباه الجميع».

 

محمد جابر، طالب فى كلية طب أسنان جامعة بنها، أحد المسئولين عن «الأوتوبيس»، قال: «خلال رحلة الأوتوبيس فى شوارع المدينة كلها كان فيه 3 أطباء متطوعين بيشرحوا لأى راكب خطورة مرض سرطان الثدى وازاى المرأة تتجنبه، والمساعدة اللى يقدر يقدمها لينا أو لأى شخص مريض».

 

يبتسم «محمد» وهو يحكى طرائف الأوتوبيس، فالناس فى البداية اعتقدوا أنه أحد برامج المقالب، كما أن رجال الشرطة حرصوا على تقديم المساعدة بكل شكل ممكن: «فى البداية فيه ناس رفضت تركب معانا، افتكروا إننا برنامج الكاميرا الخفية، وبعض رجال المرور والشرطة لما كانوا بيشوفونا كانوا بيمنعوا كل المواصلات التانية من أنها تحمّل الركاب لغاية لما احنا ننتهى ونحمل».