بقلم - أماني موسى
يعني تعمل أوردر مياه ويمر خماشر تمناشر يوم وميجيش ولما تتصل تلاقي سلسلة أعذار جاهزة بدءًا من حدوث عطل بالشركة ولا خط الإنتاج ولع، مرورًا بالعبارات المريحة بتاعة الاوردر هيكون عندك في خلال 24 ساعة انتهاءًا بعذرًا خالتي بتولد!

وبعدين دول كلهم خماشر يوم ايه لزوم الاستعجال يعني، أنت وراك حاجة والنيعمة أنا ما ورايا حاجة.

مصر يعني يبقى عندك عطل بالإنترنت ويمر أسبوعين وأنت بتسترجى ال...... اللي في خدمة العملا وهو بيعاملك معاملة مرات الأب، ليه كدة يا بابا دة أنا مواطن شريف زيك، وتبدأ في دايرة الحلزونة ياما الحلزونة من كداب لغبي لحافظ لمرواغ لكسول ومتراخي وفي الأخر بقى استنى المعجزة الإلهية لحل المشكلة، يا أخي خليك مؤمن متعشمش في بشر!!

مصر يعني مؤسسات وأفراد كسالى عاطلين عن أداء أبسط المهام!

مصر يعني تجاهل الحديث عن قامات أمثال على سالم وتجاهل نعيه أو حتى تكريمه بحياته، بينما السبكي صانع سنيما وصوفينار نجمة شباك.

مصر يعني أعلى نسب في التحرش والسرقة وتعاطي المخدرات والتكاسل عن اداء العمل وبالمقابل أعلى نسبة تدين... دولة العلم والإيمان يا راجل.

والحديث عن مصر الحلوة لا ينتهي