بولا وجيه
أحنا شعب عسل أه والله شعب عسل بنتعاطف مع كل الناس ماعدا اللي يخصنا سواء أن كانوا مصريين زينا أو حتي عرب، بمجرد ما الانفجارات حصلت  في باريس وأنا بقيت شايف كله حاطط صورته وعليها العلم الفرنسي!!

طب بذمتك مش مكسوف من نفسك ؟؟ لا بجد !!

يعني أستفدت أيه لما حطيت صورتك وعليها العلم الفرنسي؟؟ على فكرة مصر حصل فيها أنفجارات كتير جدًا وكان في أيام بيحصل فيها كل يوم انفجار ويمكن أكتر من واحد في اليوم كمان؛ عمرك شوفت فرنسي واحد حط صورته وعليها العلم المصري في الفترة دي بقى؟؟

بلاش دي عندك اللي بيحصل كل يوم في فلسطين لقيت حد حط صورته وعليها علم فلسطين المحتلة سواء مننا او من الفرنسيين؟؟

بلاش دي كمان عندك العراق عندك لبنان عندك سوريا عندك ليبيا، أشمعنا أتاثرت بفرنسا ودولنا العربية لا!!

ليه دايمًا بنحب كل الناس لكن اللي مننا لا !! نفسي بجد أفهم الموضوع ده.

على فكرة كمان التعاطف عمره ما كان بأنك تحط صورة العلم أو بالكلام أو أنك تنزل بوست على الفيسبوك، لكن بأنك تاخد موقف بجد تحسس اللي قدامك أنك فعلاً جنبه وبتساعده وبتاخد بأيده علشان يعدي اللي هو فيه.

لما تحب تتعاطف مع حد اتعاطف مع اللي يشبهلك الأول بعدين ده دايمًا بيقولوا في مثل بالرغم أني ضد المثل ده بس بيقولوا فيه أنا وأخويا على أبن عمي وأنا وأبن عمي علي الغريب.

يعني خليك الأول متعاطف مع أخوك اللي هو يعتبر أبن بلدك، بعدين لما تتعاطف مع أبن عمك وهنا مقصدش ولاد العم وكريم عبدالعزيز والجو ده لكن أقصد العرب اللي زيك، أبقى أتعاطف مع الغريب عنك .

وخدوني على قد عقلي .