قرأت أن هناك نية لدى الكنيسة المصرية، بإضافة استحالة العشرة الزوجية كسبب للطلاق بجانب علة الزنا والسجن لمدة كبيرة، وقد كان هناك حوار متخيل من ومع صديق مسيحى يطلب الطلاق، رأيت أن تشاركونى فيه لإلقاء الضوء على ظلال أخرى لتلك المسألة الشائكة، التى يعتبر البعض مجرد الاقتراب منها نوعاً من الهرطقة:

1- أنتم مين وإيه مشكلتكم؟
- إحنا مسيحيين أقباط أصحاب مشاكل فى الأحوال الشخصية نريد الطلاق والزواج مدنياً دون تدخل من الكنيسة القبطية.

2- طب ما تروحوا المحكمة هو حد منعكم تتطلقوا؟؟!!
- تم تعديل لائحة سنة 1938 التى كانت تبيح الطلاق لأسباب متعددة ومنطقية فى سنة 2008، وقصرت الطلاق على علة الزنى فقط، فأصبح من غير الممكن الحصول على الطلاق فى المحكمة إلا لعلتى الزنى وتغيير الدين.

3- إنتم بتلوموا الكنيسة القبطية على اختياراتكم الغلط؟
- محدش بيلوم الكنيسة القبطية على شىء إحنا معترفين بأننا أسأنا الاختيار، لكن إحنا فى الأول وفى الآخر بشر من حقنا إننا نغلط، لكن إحنا بنطالب بفرصة جديدة لتكوين أسرة والعيش فى حياة طبيعية.

4- المسيحية بتقول لا طلاق إلا لعلة الزنى.
- مين قال المسيحية بتقول كده مفيش آية فى الإنجيل بتقول كده، الآية بتقول من طلق امرأته إلا بسبب الزنى، لكن كل الكنايس الأرثوذكسية وقوانين الكنيسة القبطية القديمة قبل البابا شنودة فسرت الزنى بمعنى انعدام القداسة عن الزواج، دى قوانين كل الكنايس الأرثوذكسية وقوانين الكنيسة القبطية القديمة قبل البابا شنودة http: //j.mp/nH4vWu يا ريت تقراها واحكم رأى المسيحية إيه.

5- بص هى تعاليم المسيح كده يا تقبلها كلها يا ترفضها كلها عاجبك عاجبك، مش عاجبك روح سيب المسيحية.
- هى تعاليم المسيحية كلها تدور حول موضوع الطلاق!!! لدرجة إنى لو رفضت تعليم الكنيسة القبطية فى الطلاق، اخرج بره المسيحية مع مراعاة أن كل الكنايس الأرثوذكسية التانية بما فيها الكنيسة القبطية قبل البابا شنودة بتطلق لغير علة الزنى، فالناس دى برضه المفروض يروحوا يطلعوا بره المسيحية؟!! ولا حلال ليهم وحرام علينا!!!

6- ليه بتضغطوا على البابا بشىء يخالف الإنجيل؟ الموضوع ده مش بمزاجه ولا مزاج حد تانى، ده كلام المسيح.
- نحن لا نطالب الكنيسة القبطية بأى شىء، غير أنها لا تضغط على الدولة لعدم تمرير قانون مدنى للمسيحيين فى مصر زى ما الكنيسة القبطية بتعمل حالياً (http: //j.mp/qLKUsB). ومن حق الكنيسة القبطية بكل بساطة طرد من لا يلتزم بتعاليمها من عضويتها، لكن ليس من حقها طردنا من المسيحية.

7- الحمد لله ما عندناش طلاق عشان ميبقاش فيه تشرد للأطفال.
- فيه حاجة اسمها قانون ونفقة وحضانة ورؤية يعنى بعد الطلاق فيه قوانين للقصة دى مش مجرد طلاق، وبعدها الأطفال يضيعوا ويتشردوا. وبعدين الطلاق أحسن نفسياً للأطفال من إنهم يشوفوا أبوهم وأمهم بيتخانقوا مع بعض كل شوية.

8- طب ما تغيروا ملة ده هيحل مشاكلكم وفى حالة اختلاف الملة يتم تطبيق الشريعة الإسلامية ويصبح من السهولة الحصول على الطلاق أو الخلع.
- اتفقت الكنيسة القبطية مع كل الطوائف المسيحية فى مصر على عدم إعطاء شهادة تغيير ملة لراغبى الطلاق نتيجة ضغط الكنيسة القبطية عليهم. الطريق الوحيد الآن هو شهادات تغيير ملة من لبنان ثمنها 30 ألف جنيه، وفى معظم الأحيان تكون مزورة، مما يعرض صاحبها للسجن بدلاً من الطلاق!.

9- ما تتجوزوا فى مكتب توثيق هو لازم يعنى قانون مدنى؟
- مكتب التوثيق يشترط تصريح زواج من الكنيسة القبطية ومن الطبيعى أن الكنيسة القبطية مش بتدى التصريح ده، فكده من غير الممكن للمسيحيين الزواج فى مكتب توثيق حالياً. وحتى لو مكتب التوثيق ما طلبش تصريح من الكنيسة قانون الطلاق حالياً مانع الطلاق إلا لعلة الزنى، فكده مفيش حق فى الطلاق.

10- إنتم ناس بتجروا ورا شهواتكم.
- الحق فى الحياة، وتكوين أسرة أصبح شهوة؟!!! هى دى نظرتكم للجواز مجرد شهوة؟

لو كنا بنجرى ورا شهواتنا كنا عملنا علاقات فى الظلام وقدام الناس نروح الكنيسة، ونصلى وماكنش حد هيعرف حاجة ولا حد هيدينا ولا حد هيهاجمنا زى دلوقتى عشان عايزين نعيش فى النور ونكوّن أسرة، ونعيش حياة محترمة.
نقلا عن الوطن