ماذا يحمل  القدر أسوأ مما حمله فى الاطاحة باطفال المنيا خلف القبضان لاتهامهم بازدراء الاديان ، لداعبة فى رحلة ترفيهية ، وبعد ما حمله من نفس الاتهام لمعلمة الاقصر دميانه عبد النور لمجرد انها وضعت يدها على بطنها اثناء تدريس الاديان فى مصر القديمة تحول لازدراء بحجة تفسير وضع اليد بانها " تريد ولا مؤاخذه " تتقيأ" ، وهو نفس المصير لكيرلس فى ارمنت لمجرد ليك على صفحة ...

 

ويستمر ازدراء الاديان فى التجريف والقتل ويتهم اشخاص لمجرد " انميشن " صورة تعبيرية يستغلها المتشددين لتفسيرها الى ازدراء اديان ..

انت بتقول ايه " انيمشن ايه " ، ايوه والله انيمشن على الفيس بوك اللى احنا كل شوية بندوس عليه مرة يضحك مرة يكشر حسب تعبيرك ، طيب ازاى ...

يا سيدى واحد اسمه جرجس فوزى بقرية جنيفه بالسويس وهى اغلبية مسيحية ، عنده صفحة على الفيس بس هو ملوش فى استخدامها بس بيعرف يقبل طلب صداقة وكان اللى عاملة الصفحة ده واحد صديقه مسلم ودخل كلمة السر لدخول صفحته انه يكون رقم تليفونه اللى كل البلد عارفه ، لان هم عائلة كبيرة ووالدة كان عضو محليات والقرية لها تاثير كبير فى الانتخابات

 

طيب وبعدين ، وبعدين يا سيدى فى جروب لقرية جنيفه عليه 2000 شخص ، وكانوا حاطين صورة المستشار احمد الزند ، وزير العدل السابق وعليها حوار كتير ما بين مؤيد ومعارض ، فدخل واحد باسم جرجس لان  كلمة السر معروفه رقم تليفونه " راجل بسيط بقه" وكان واحد بيعلق على الزند وكتب " حسبنا الله ونعم الوكيل " ، فابسم جرجس واحد رد على التعليق وحط انيمشن " اللى مطلع لسانه " ، وطبعا المترصدين متفقين يعملوا ضجه ازاى يعمل كده وكده بيسىء للاسلام ، والمهم واحد دخل مسح الانميشن ده من الجروب لكن طبعا الموضوع بيكون جهز تجمهر شوية وطالبوا زى ما انتوا عارفين اللى يقول يمشى واللى يقول يموت ، واللى يقول يتحبس

طبعا جرجس مش عارف حاجة كلمه قسم الشرطة ، وهم عارفينه كويس لانه راجل خدوم وبيحل مشكلات ، قالوا له تعالى ده حصل كذا ، قالهم انا معرفش حاجة ، المهم راح القسم وناس حررت محضر واتحول للنيابة ، طبعا النيابة مش شايفه فى موضوع اصلا فاخلت سبيل جرجس دون ضمانات ، وقسم الشرطة قال لجرجس خلينا معا علشان حميتك وبيت ليلة فى اوضه المأمور لكن طبعا الموضوع مخلصش لان فى ناس بتشعل النار .

 

طيب حصل ايه .. القسم طلب منه عمل قعده وبعض المسلمين طالبوه يعمل لافتات كبيرة للاعتذار .." اعتذار ليه " ..اه والله اعتذار ويتعمل قعده " جلسة عرفية " ويقدم اعتذار ، جرجس رفض قال " اعتذر على ايه لو انا اعتذرت يبقى ان كده عملت غلط وانا معملتش حاجة ..

 

ياعم جرجس عادى ده قعده كده لتهدئة الامور ، بلاش تعقدها ، لكن جرجس قال اعتذر هو انا عملت حاجة ، المهم قالوا له ياعمنا بلاش اعتذار هتبقى قعده ونقوم نحضن بعض وخلاص من غير ما تعتذر ، قالهم مفيش مشكلة نحضن بعض هى جات فى جمل ، طيب وبالنسبة للناس المحرضة واللى عملت ضجه وكدب دول عادى كده ،قالوا لا ما هم فى القعده وبرضه هيحضونا بعض ..

 

ايه القعده اللى كلها احضان ده ..هنعمل ايه يا جرجس ده طقس ولازم منه علشان الامور بس متولعش ، طيب وامتى القعده نخليها يوم الجمعه انشاءلله وربنا يهدى الجميع 

 

صحيح يا جرجس هم عملوا معك كده ليه ، الموضوع ان قرية جنيفه اغلبية قبطية ودائما فى المحليات بتكسب وفى قريب انتخابات جمعية التنمية وانا واخوى داخلين فيها ، فقالك فرصه نضرب العيلة ده قبل الانتخابات ، علشان نقدر ناخد مكانهم والناس اللى عملت كده معروفه بالاسم وممكن اقولهم ، بلاش اسماء يا جرجس مش عايزين نهيجهم تانى طالما الشرطة عارفهم 

 

انميشن يا سياده ، وصل الحال بنا الى انميشن على صورة الزند تحول لازدراء اديان والناس جهزة ، على طول هو يمشى احنا مش هنمشى ، وطبعا رغم عدم اثبات اى ادانه والنيابة كانت بتضحك على الهزل ده وتم اخلاء سبيله الا انه برضه لازم يقعد فى قعده تهدئة ، ماشى ياعم القرية كده طيب الناس اللى اثارت الفتنه والتحريض خلاص " بح " ، وكمان هيقعدوا ويتحضنوا ويتبسوا ..طيب وبالنسبة لموضوع الازدراء ده ملوش حل ...ياعم قلنا سيبها بقه خلى المتطرفين يتسلوا وياخدوا حريتهم ...انا هسكت خالص اهو ؟

الى اللقاء فى مقال جديد مع انميشن جديد وضحية جديده ؟

يقطع الفيس على النت على النتت على رأى الكبير اوى  ؟