.....جمعة ختام الصوم.....
اليوم يا شعب المسيح.....جمعة.....ختام الصوم
إوعي تقول تعبان.....م الصوم.....يا عيب الشوم
كله كوم.....ولحن.....ميغالو كوم
سر مسحة المرضي.....تشفي المريض.....ويقوم
عايزك تفرح.....كلها يومين وتقول.....ثوك تاتي جوم
.....سبت لعازر.....
قيام لعازر م الموت.....هو مثال للقيامه
لرب المجد يسوع...أجمل قصه...لأحلي علامه
علامة الصليب...بيها أقول للشيطان...روح مع السلامه
لعازر كان عيان...الغريب...يسوع كان عارف
ويسوع كان بيحبه...وأهل بيته...حب جارف
كان لازم لعازر يموت...ويدفن...وتعلو الصرخات
والكل يشعر بالفعل.....بالألم والضيقات
وفي الوقت المناسب.....يقوم م الأموات
بكلمه واحده من يسوع...تنفك...قيود ورباطات
هي دي قصتي.....وقصة كل إنسان
لما أعيش ف الخطيه.....محتاج لكلمة حنان
من يسوع ربي...مالك الكون...ديان
يسترني بمحبته.....لما أكون عريان
ويسقيني دمه الطاهر.....بالفعل أنا عطشان
وأشبع بجسده المقدس.....لما أكون جوعان
بجراحاته يشفيني.....بالفعل أنا عيان
أحد الشعانين.....
بسرعه وصلنا لحد السعف.....حد الشعانين
يسوع داخل أورشليم...عشان كده...فرحانين
أورشليم هي قلبي.....يملك طول السنين
راكبا علي جحش...ف النبوات...قايلين
فرشوا زعف النخل...م الفرحه...مش مصدقين
والقمصان ع الطريق...للخطيه...مش راجعين
عملنا بالخوص صليب...بالأيادي...رافعين
حريه ...لا عبوديه...بعد ما كنا مسبيين
يارب إملك قلبي...للملكوت...مشتاقين
ليك أنت وحدك...حياتنا...مِسَلِمين
أوصنا يا إبن داود...قولوا معايا...أمين
يوم الإثنين من البصخه المقدسه.....
يوم الإثنين ده...بصراحه...كان يوم عجيب
يسوع في أورشليم...ف الهيكل...للأسئله يجيب
لعن شجره التين...للثمار...ما تجيب
يقصد ثمار حياتي.....مش عايزني أخيب
طهر كمان الهيكل...م التجاره والتقليب
في ملكوتك يارب.....إجعل لي نصيب
إسمع يارب صلاتي...لسؤالي...أنت المجيب
لهدب ثوبك أنا ماسك...مش ممكن...أبدا أسيب
يوم الثلاثاء من البصخه المقدسه.....
ثُلاثاء البصخه المقدسه...مع رؤساء الكهنه...صِدام
مناقشات ومجادلات...مغالطات...إحتدام
كلام مع التلاميذ.....عن المجيئ التاني
وإشارات للصليب....وسفك الدم القاني
حديث عن الدينونه.....وحياة الإستعداد
نصيحة رب المجد...ف الطريق...لا تحمل عتاد
جزية قيصر...خراب الهيكل...كان هو الموضوع
ومَثَل العشر عذاري...كلام...لكل الجموع
إلي بيت عنيا ذهب...أخيرا...ليستريح
بعد أن أتم النصايح.....بكلامه الصريح
يوم الأربعاء من البصخه المقدسه.....أربع أيوب
مافيش حد خالي...من الخطايا...والعيوب
لازم تكون حياتك...فيها ألم...وثقوب
عشان كده...حاول تشارك...يسوع ف التوب
توب الألآم والتجارب.....زي ما عمل أيوب
مش بس كده.....تشارك عند الضروره
بسكب الطيب النقي.....من أجمل وأحلي قاروره
علي راس المخلص...من قلبك...بنفس مسروره
إوعي تكون يهوذا.....وتبيع يسوع بالفضه
أو تنكر رب المجد...أحيانا...في وقت الشده
زي ما عمل بطرس...بصوت عالي...بحده
يوم الخميس من البصخه المقدسه.....خميس العهد
عيد سيدي صغير.....هو خميس العهد
بذل فيه يسوع...كتير...م العرق والجَهد
غسل أرجل التلاميذ..معناه...توقيع العهد
إن الحقير ع الأرض...يصير...ف السما فهد
كمان يوم الخميس...تأسيس...سر التناول
جسد ودم طاهر...بأيده...للتلاميذ ناول
شرح ليهم الفداء.....بالرسومات والجداول
عبدك يارب مسكين...للتوبه والجهاد...بيحاول
يارب إجعلني بولس.....ولا تجعلني شاول
.....الجمعه العظيمه.....
يالها من جمعه عظيمه.....يسوع.....ع الخشبه مصلوب
البار الخالي م الخطيه.....م الحريه.....مسلوب
وأنا حر طليق.....مع إني.....مليان ذنوب
أسير لعادات.....م الشيطان.....مغلوب
إكليل م الشوك.....مفروض.....يكون ليا
عقاب علي أفعالي.....أنا.....مُدمِن للخطيه
لكن حبه عظيم.....فداني.....دفع الديه
لازم بقي أتوب..........أنفذ الوصيه
أعيش بإستقامه.....التوبه.....تكون قويه
حربه ف الجنب اليمين.....خرج دم وماء
إمتي أكون حزين؟.....علي أفعالي.....مُستاء
قلبي م الأن ليك..........ليك كل الولاء
توبني يارب فأتوب.....نفسي.....أفوز بالسماء
من أجلي يارب.....إحتملت.....دق المسامير
وأنا ف العسل نايم.....راقد.....ع السرير
خالي م القداسه.....الفكر.....فكر شرير
لا فاتح إنجيلي.....ولا حتي.....المزامير
المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع
English
المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع
المنتدى الدولى للحقوق والحريات يهنىء الاقباط متحدون بعيد القيامة المجيد 