الوطن | الاربعاء ٢٢ يونيو ٢٠١٦ -
٠٩:
٠٤ م +03:00 EEST
«حسين» صاحب ورشة تصليح قدور الفول
فى منتصف شارع «أمير الجيوش»، أو «مارجوش» فى منطقة باب الشعرية، يقف حسين محمد إسماعيل، 48 سنة، أمام ورشته القديمة التى تتوسّط الشارع الضيق المؤدى إلى حى الجمالية، وشارع المعز، واضعاً قدور الفول الجديدة التى تلمع بشدة، بعد انعكاس أضواء الشارع على سطحها الفضى، لجذب الزبائن من أصحاب مطاعم الفول والطعمية لشراء القدور الجديدة وتصليح البالية.
ورث «حسين» المهنة عن والده، لم يمتهن غيرها طوال حياته حتى صار من أشهر «صنايعية» تصليح قدور الفول وقدور فرم الطعمية فى منطقة باب الشعرية، ورشته من الداخل متسعة وبسيطة، يعمل بداخلها فتى صغير يقوم بكل المهام التى يطلبها صاحب الورشة باهتمام شديد، وتحتوى الورشة على عدد كبير من قدور الفول القديمة، والأوانى المتنوعة من الألومنيوم، بجانب أسياخ حديد وشواكيش خشب لزوم العمل الشاق الذى يبدأ يومياً فى العاشرة صباحاً وينتهى بعد منتصف الليل.
«رمضان شهر خير بالنسبة لنا علشان الشغل بتاعه بيكون كويس جداً، وبننتظره من السنة للسنة، أصحاب المطاعم وعربيات الفول شغلهم بيكون كتير جداً فى الشهر ده علشان وجبة السحور الرئيسية، وعلشان يقدروا يلبوا الطلب المتزايد على الفول، بيصلحوا القدور البايظة علشان يعدوا الموسم بتاعهم».
يشرح «حسين» طريقة إصلاح القدور: «بنصلح كل أنواع أوانى الألومنيوم، بداية من قدور الفول وحتى أوانى فرم الطعمية، والزبون لما بيحس إن قعر القدرة اتهرى أو اتاكل، بيجيبه لنا علشان نصلحه، وفيه زباين بتستنى لحد ما القعر يتخرم وينزّل ميه، ولما القدرة بتيجى لنا، بنقوم قاطعين القعر الدائرى القديم بالمسمار والشاكوش وبنركب واحد غيره حسب طلب الزبون، وبنلحمه بالألومنيوم وبيتصنفر بعد اللحام علشان يكون ميه واحدة وناعم وشكله جديد، وبنحط برضو سيخ حديد فى رقبة القدرة أو حلة الطعمية علشان تقدر تتحمل حركة ماكينة الفرم».
قُدرة الأوانى الألومنيوم على التحمّل، تعود -حسب «حسين»- إلى سُمك أو تخانة الإناء أو القِدرة: «يعنى مش هنجيب القدرة اللى قعرها 4 مللى زى اللى قعرها 6 أو 8 أو 12 مللى، والقدرة ممكن تعيش العمر كله، وممكن تبوظ بعد سنة واحدة حسب تخن الألومنيوم، وحسب عدد مرات الاستخدام، لأن النار بتاكل أى حاجة». التصليح أفضل من شراء الجديد..
قاعدة يؤمن بها «حسين»، ومن أجلها وجدت الورشة: «الجديدة بـ700 جنيه، لكن التصليح مش هيتكلف أكتر من 150 جنيه بس.. يبقى التصليح أحسن بالنسبة لباعة الفول». وعن صعوبات العمل التى تواجه صاحب ورشة تصليح قدور الفول: «مهنتنا كلها شقا، وبتعتمد على الصحة، ولو الواحد فينا تعب مابيقدرش يشتغل، وشارع (مارجوش) كله ورش تصليح ألومنيوم وتصنيع كولديرات وتلاجات تبريد ميه، والشارع ده مشهور جداً وبييجى له ناس من جميع أنحاء الجمهورية علشان يصلحوا فيه القدور بتاعتهم».
English
