تظاهر عشرات المواطنين، اليوم الخميس الماضي، طريق كورنيش شبرا أمام معهد ناصر، احتجاجًا على رفع أسعار لبن الأطفال المدعم، ورفض الشركة المصرية لتجارة الأدوية صرفه، ما تسبب في شلل مروري تام بكورنيش النيل.

 

وقالت إحدى الأمهات: "مش عايزين يدونا لبن، وطردونا من على الشبابيك، وقالوا الوزير رفع اللبن، واللبن في الصيدليات بـ70 جنيه، المدعم بـ17 وخلوه بـ25 وقلنا ماشي بس أجيب الـ70 جنية منين"، حسبما أفاد الوطن.

 

وقالت جدة طفلة: "دي بنت أبني وأمها ماتت ومفيش حتة نجيبلها منها لبن خالص، وأبوها أرزقي وأنا جاية أجيبلها اللبن، جيت أجيبه من الصيدليات لقيته بـ65 جنيه، مش ملاحقة أجيب لبن ولا أجيب إيه، وأبوها ساكن بالإيجار بيدفع 700 جنيه في الشهر، والظابط هنا قالي لي  إحنا عاوزين الأطفال تموت".

 

ووافقت على كلامها أم أخرى قائلة: "اللبن بـ70 و80 جنيه، معايا عيل 6 شهور ومعنديش نقطة لبن في البيت أأكله إيه، أنا جاية من المنيب لحد هنا علشان اللبن، أجيب منين أنا بقى، أسيب الواد يموت؟".

 

يذكر أن  وزارة الصحة قررت في مايو الماضي، خفض اللبن المدعم من 23 مليون علبة سنويًا إلى 18 مليون علبة بداية من يونيو الماضي، واعتمدت إجراءات جديدة في توزيعه، والتي لم تحل أزمة طوابير البحث عنه.