"ثورة الجياع قادمة، الثورة جاية لا محالة، ثورة الجياع هتسيطر".. ماشي، تعالوا كدة نشوف إحتمالية قيام الثورة دي كام في المية؟

ثورة ٢٥ يناير قامت على النظام القديم، وأول مطالبها عيش وبعدها حرية وبعدها عدالة إجتماعية، وطبعاً كلنا عارفين أزمة طوابير العيش وغلاء الأسعار، وأزمة أنابيب البوتاجاز قبل ٢٠١١ كانت عاملة إزاي؟

وقامت الثورة و ما لحقها من حفر في الاقتصاد ، وتجريف لمصادر البلد، وخراب بيوت، وقفل مصانع، وضرب سياحة، واكتمل الخراب بزمن الاخوان و ما أدراك ما زمن الاخوان. أزمة كهرباء، أزمة بنزين، وأزمة أنابيب، وبعدها ثورة ٣٠ يونيو، و مابعدها من خطوات لمحاولة إصلاح  ما تم إفساده، و حروب الجيل الرابع و الاشاعات وتشجيع من فئة كبيرة في مصر على مقاطعة مصر سياحياً، وبوستات ضد السياحة و هكذا .. إذن نتائج الثورة كانت حفر الاقتصاد مش تحسين مستوي المعيشة .

تعالوا نشوف كام بلد كده..

الهند مثلا نسبة الفقر فيها كبيرة جداً و الطبقة المتوسطة تكاد تختفي، هل قامت فيها ثورة جياع؟!

اريتريا ، مالاوي ، زيمبابوي ، من أفقر الدول في العالم، هل قامت هناك ثورة جياع ؟

نشوف بقي نموذج إيجابي شوية كوريا الجنوبية، و انهيارها الاقتصادي من سنة ١٩٦١ إلى سنة ١٩٧٩ و انهيار البنية التحتية، ادارة دولة، اهتمام كبير، و بدايته   الإقتصاد، والتركيز على الشركات العملاقة.. و اكيد كلنا عارفين كوريا الجنوبية اصبحت إزاي بالعمل و الادارة مش بثورة جياع.

و تعالوا نشوف الناس اللي كانت بتهتف بالعيش و الحرية في يناير و بتنادي دلوقتي بثورة جياع ... معظمهم اشتروا عربيات، سافروا و لفوا العالم و الباقي جاله منح معظمها في بريطانيا و يقولك ثورة جياع.

انا أسمع وأفهم عن الأزمة من واحد عايشها فعلًا، حارس العمارة، عامل في مصنع و بيكون كلامه شكوي من حال البلد و الدولار وربنا يصلح الاحوال، و بتكون الشكوي ايجابية و عمري ما سمعته بيقول نعمل ثورة جياع، بل بالعكس هو شايف ان اللي حصل للبلد بسبب الثورة و الحال قبلها كان احسن.. انما تبقى راكب مرسيدس و بتنادي بثورة جياع بالريموت كونترول وانت قاعد في الليفنج ده مش منطقي.
 
واحنا بقى كالعادة بنحب الجدال و الكيد و كالعادة كل واحد  يحب ينزل بوست عن صورة السينيما كامل العدد ، الناس في الساحل ، عدد المدارس الدولية و مصاريفها و انا عن نفسي اتكلمت عن طابور الجبن اللي وقفت فيه ساعة وربع لحد ما يبجي دوري، قوم ايه نلاقي شتايم و اتهامات، وقصادها طبعاً بوستات ازمة انابيب ، طفل فقير في الشارع يفتقد فرحة العيد .. و هكذا.

ربنا لو خلق عين واحدة كان منطقي نشوف طرف واحد انما سبحانه و تعالي خلق لنا اتنين و لازم نشوف الجانبين و إلا هنكون بنضحك علي نفسنا ،، زي مافيه طوابير عالسينيما في طوابير عالمستشفيات الحكومية  .. لاننا بلد و كل بلد فيها و فيها.

الناس دي دارسة و فاهمة كويس هي بتعمل إيه.. تحديد ميعاد مميز لشد الانتباه ١١/١١ معاد شيك جداً لثورة ، زي بالظبط ما الكتاب بيقول أعمل معاد للحدث مميز و محدد، يلفت النظر ، نبدأ ننزل بوستات و نكرر كلمة ثورة الجياع قبل الأكل و بعده لمده شهرين، و أي حد هيعترض أو ينزل بوستات عكسهم يلعبوا عالارهاب الفكري و يتهموك بالطبقية و انك في قصر عالي و مش حاسس بالغلابة عشان تسكت ، قوم ايه تترسخ في العقل و تبتدي تربط كل حدث حتى لو مفيش ربط بالثورة اللطيفة دي .

هل سألتوا نفسكم اللي هيعملوا ثورة الجياع دي عندهم تويتر و فيس بووك ولا حتي واي فاي؟ يبقى التوقيت ده ليه؟ و الغرض من النشر عالنت إيه، و بالانجليزي كمان!! عشان تحشد و تطبق خطط حروب الجيل الرابع في الحشد النتاوي زي ٢٥ يناير .. الأهم ان محدش يضحك علينا و يحقن مخنا بتكرار كلمة ثورة الجياع .. عشان هما ماشيين بمثل : بكتر الزن عالودان امَر من السحر .

أسوأ من كدة مرينا بيه و بلاد كتير مرت بيه ، الثورة الحقيقية هي ثورة العمل و القضاء على السلبيات.

اضحك و اعمل بوستات كوميكس و كيد براحتك بس خلي بالك لان فيه خيط رفيع جداً ممكن يحولك لشخص طبقي ،، فإحذر هذه الدائرة !!!

ها النتيجة طلعت كام في المية !؟؟
نقلا عن دوت مصر