بقلم: شيماء قطب
ورا بعض كدااا

خلينا نعترف مرة فى حياتنا اننا كتير كنا غلط.

خلينا نعترف ان فيه ناس استحملت قرفنا لحد لما طفشوا.

خلينا نقول ان احنا اتغابينا كتير و استهبلنا أكتر و كان فى ايدينا فرص بس احنا اخترنا نضيعها.

كفاية الposts  اللي بطلعك على طول ضحية عشان ساعات كتير مبتبقاش شايف نفسك وانك لو حاولت تـ visualize  المواضيع من منظور تاني، هاتلاقى نفسك انت اللى غلطان.

 اعترفوا مرة انكم غلطتوا في حق ناس و انكم كنتوا غلط و مش دايما الناس اللى بتسيبنا، و ان احنا اللى مجروحين على طول، لأن كل بني آدم ليه سعه تحمّل و منهم ناس استحملتك كتير بس مقدروش يكملوا و ده مش معناه ان هم غلطانين ..

كلنا بنغلط..  مش معناه انه حد فينا وحش و التاني ملاك لأ، الطرفين كويسين بس الخلافات واردة و كل واحد لازم يـ check  تصرفاته و ينتقى الفاظه و يعرف ان الكلام اللى بيتقال مبيتسحبش.

كفاية Posts سلبية حزينة عن الناس و اد ايه هم وحشين و اشرار و قلبهم ميت.

خدوا الموقف حللوها و شوفوا الغلط فين و اتعلموا منه لأنه احتمال تكون انت اللي مليان عقد و بلاوي زرقا!!

 ممكن تلاقي  ناس كنت تتمني تعرفهم في ظروف أحسن لأنهم ناس جميلة بس انت اللى دماغك كانت تعبانة لا مؤاخذة يعني، ليه لأ؟ مش يمكن انت اللى لا تطاق يا أخي؟ صلحوا نفسكوا و غيروا من نفسكوا للأحسن المواقف اللى بتحصلكوا هي نقلة بس عشان تبقى انسان أحسن مش عشان تفضل محصور في نقطة مبتطلعش منها و تفضل تردد جوه نفسك "انا الضحية"..  "انا الضحية"!!

 مفيش ضحايا فى أى مشكلة ..بس فيه اتنين فهموا بعض غلط يا اما Their good didn't meet.

بص للناس اللى انت اكتشفت انهم استحملوك و اشكرهم انهم اصلا استحملوك و استحملوا غباءك احيان كتير و اضحك في وشهم و قلهم انهم ناس كويسة و جميلة و امشي.

الناس مش للدرجة دي سيئين زي ما البوستات الكئيبة بتقول، لو الناس كلها شايفة انها ضحية امال مين اللى ظلم؟ نفسي أفهم بجد..

نتعلم بقى و نبطل ولولة فى أم الماضى و الجراح و نحاول نخرج من دور الضحية دة عشان ندى نفسنا فرصة للتغيير،أو ع الأقل ندي لنفسنا فرصه نتنفس ونشوف بوعي اكتر مش ببرأ نفسي من حاجة ولا مثالية مني البوست دة بقوله لنفسي قبل أى حد.

أتمني تكون الرسالة وصلت.

#كفايه_عك_بقي_نفسي_احس_اني_عايشه_ف_وسط_ناس_راقيه