بقلم: وجدي شحات
كله تمام،، كله تمام،،
شويه ماتوا على باب الكنيسة قنبلة انفجرت أو سيارة ملغومة أو يمكن حد إرهابي، صومالي أفغانى أو باكستاني فجر نفسه بعشرة كيلو أو تقريبًا خمستاشر كيلو دي دي تي، وشويه مسامير وصواميل، مصدرهم عم خليل بياع الخردة اللى جنب عبد الغفور البرعي..
بتقول كام واحد مات..؟؟
مات شوية وعشرين هو العدد مش معروف، أصل العمليه كلها طالعة من النافوخ، لحم ده على لحم دي، مبقتش عارف أعد بالظبط كام قتيل، نقدر نقول حاجة وعشرين، ده طبعا غير المصابيين المشوهين، واللى إيديهم أو رجليهم مبتورين..
بصراحة يسلم مخك يا أبو مخ جنان
طب والبلد عامله ايه من جوه..؟؟
لا اطمن خالص شربوا المقلب وبقى هلال ويا صليب.. مصحف مع إنجيل.. شوية مجانين ماشيين في جنازة ولا تقدر تقول قال إيه مظاهرة تنديد.. وشجب وحجب ودقيقة حداد.. وطنية وطنية أحسن من كده مفيش.
وبره البلاد الخارجية عاملين ايه؟؟
مقلوبين ومتبهدلين خايفين ومرعوبين، والفضل كله لمخك الرهيب، برسالة على الفيس بوك تستهدف كنايسهم، اتقلبت بقدرة قادر تهديد ووعيد لكل كنايس أوروبا وأمريكا وكندا...
يعنى كله تمام مفيش مشكلة ولا أي كلام؟
ممممممم
فيه بس نقطة بسيطة جاري العمل عليها ومعالجتها في ساعات قليلة، هنمسح أمخاخ اللى يقولك "صنع في مصر" دول شويه غوغاء عاملين مثقفين، وعلى القهاوى متنطورين، قاعدين يقولوا احنا السبب واحنا اللي مفجرين الكنيسة وووو.....؟!
وايه انطق وقول؟؟
ووووو عاوزين يفتحوا القديم والجديد... من الكشح للنجع والعمرانية لحد الإسكندرية،،
سيبك منهم دول على صوابع الايد معدودين ميهمكش منهم المهم الشعب متكيف وفاهم ان دول ارهابيين ومن بره البلد جايين.
والإعلام؟
دى ورقتك الرابحة يا باشا... كلهم متخدرين تحت راية الهلال والصليب ملفوفين.. تصدقك سعاتك الكام أغنية الوطنية اللي حضرناهم رميناهم ومش زعناهم! أصل القنوات لوحديها ومن الحماسة ألفت أغانيها إشي وطنية واشي شعبية.. ورايات سود وحداد على كل عربية وكمان بياع الفول الطعمية باع للست المسيحية واتوصى بيها شوية..
طب وكبار البلد..؟؟؟
دول بقى بالملايين راصدين وبالألفات متبرعين لأسر الضحايا والمقتولين،،

وعملتوا إيه في الراس؟؟
بنجمع فيها يا باشا بس مخدناش قرار نخليه أفغانى ولا باكستاني؟؟

طب ركزوا في موضوع الراس هو فيه كل الخلاص من الحوسه واللوسه بدون قصاص..!!

ايه الحمد لله إننا اتوفقنا في إدارة الأزمة!!