بقلم: وجدي شحات
مختل عقليًا,, يعنى مجنون أو قول مش فاهم أفعاله يعنى إنسان خطر على المجتمع لأنه ممكن يقتل ويدمر، ممكن يذبح ويعور وممكن يتهور ويفجر نفسه كمان .. هو مش ساحر هو إنسان عادى زيي وزيك كل مشكلته انه ملقاش اسبتاليه تلمه وتمنع جرمه ,,

المجنون ده خطر كبير على الأمن,, ولازمله حل,, حل جذري ,, يا ترى نعمله إيه ؟؟
نبنى ليه مستشفى ولا نقبض عليه ونحطه في السجن ؟؟ ولا نلاقى حل جذري لموضوع المختليين عقليًا دول ونريح البلد من أفعالهم الغريبة؟؟
المشكلة يا ساده أن البلد واضح كده أنها أصبحت مليانه مجانين .. مختليين .. !!
البلد دى أصلاً أصلاً عاشقه لطرد العباقرة، والمفكرين والمبدعين الواحد، بقى خايف على البلد ليجى وقت ومنلاقيش فيها غير شويه مجانين.. دباحين .. مختليين !!
المجنون ده يا ساده بيلعب بالبلد زى مهو عايز ,, فجر هنا ,, اقتل هنا ,, موت هنا ,, اذبح هنا ,,
-      من كام سنه المجنون إعلان الحرب على الزوايا الحمراء.
-      من كام سنه المجنون طلع ذبح أهالي الكشح وشوه جثثهم .
-      من كام سنه نفس المجنون هاجم الأديرة وضرب نار على رهبانها .
-      من كام سنه هو هو المجنون طلع في أسكندريه ودبح واحد قدام باب الكنيسة.
-      من سنه المجنون ضرب نار في"نجع حمادي"قدام الكنيسة وقتل سبعه .
-      من كام شهر المجنون حرق بيوت المسحيين في قرية"النواهض".
-      من سنه برضه نفس المجنون حرق ورش المسحيين في"بهجوره".
-      من كام سنه المجنون حرق مسرح مطرانيه"سمالوط".
-      من كام شهر المجنون حرق ترب النصارى حتى الترب مسلمتش من جنونه .
-      من كام شهر الأمن ضرب أهالي"العمرانية"في الكنيسة وطلع الرصاص مجنون .
-      والمجنون هوه هوه بيطلع بمظاهرات ضد الكنيسة.
-      وهو نفسه المجنون بيتهم الكنيسة بأنها ترسانة أسلحه.
-      هو هو المجنون بيعلن للجميع أن الكنيسة سجن لتعذيب الأسيرات حتى الموت .
-      مش هوه هوه ده نفس المجنون اللي أباد قطيع الخنازير بسبب الخوف من انفلوانزا الخنازير، وكويس انه ساب الطيور ولم يبديها وإلا الشعب كان هياكل تراب بدل الطيور .
-      والأيام دى يا ساده المجنون كان تعبان أوى ركب قطر"المنيا"وأطلق نار عشوائي، فقوم إيه علشان الرصاص مجنون ميصيبش غير المسيحيين .
 
أنا خايف لحسن في يوم من الأيام نلاقى وثائق ويكليكس بتعلن أن المجنون هو هو نفس المجنون هو السبب في الأحداث الكتير اللي حصلت في"مصر"، من زلزال 92 وحرق قطار الصعيد وغرق العبارة وانهيار جبل المقطم وذبح اسر في"المنيا"وسرقه أعضائهم .. الواحد بقى خايف لحسن الشبورة وحوادث الطرق، تطلع نفسها مجنونه وأنابيب البوتاجاز كمان مجنونه ,, أنا مكنتش اعرف في"مصر"غير أن القوطة بس ها اللي مجنونه !!!
 
يا ساده المجانين كترت ,, أصبحت تقتل وتبيد ,, أصبحت حرة طليقه ,,
هو إيه المجنون ده مبيمتوش خالص ؟؟ معاه حصانه ؟؟ ده طالع بكل المناظر في كل الأفلام !! حاجه غريبة تطير العقل اللي باقي من الواحد !!
صدق اللي قال المجانين في نعيم ,, بس في
"مصر"المجانين حريين مطلوقين ,, من غير رقابه ولا وعيد ,, من غير تهديد بيقتلوا في عز الضهر وعلني...!!
 
ألا يوجد عاقل واحد في هذا البلد يقف ضد كل هذا الجنون؟؟ .