بعد ما خلصت الكتابة إمبارح نزلت الشارع أجيب العيش الفينو زي ما إتفقنا فى البرنامج اليومي كنت عاوز أحضر القداس النهاردة الجمعة قلت خلاص مش لازم أسهر تحت زي كل يوم أتفرج شوية على التلفزيون و كان ما كان خبط و رزع على باب البيت الحديد أبص من البلكونة جمهور من البشر بيحاولوا يدخلوا البيت تبعنا و لا تبع الناس التانيين مش عارف مش قادر أميز اللأشخاص و الأشكال , مش عارف أعمل إيه ناااااااااااااااااار نار ولعت على سطح بيتي البيت اتحرق الحق اقفل الغاز افتح الباب بسرعة علشان نطفي النار بس الصراحة أنا مش شايف النار هم معانا و لا مع التانيين مفيش وقت أفكر مش عارف بجد أفكر رميت سلسلة المفاتيح مش عارف لمين جريت على باب الشقة أفتحه و أطلع لفوق حذرت مراتي و قولتلها إقفلي عليك باب الشقة كويس و ما تفتحيش جريت على فوق مكنتش لوحدي كان فيه 30 او 40 واحد بيجروا على السلم معايا كله طالع لفوق هجوووووووووووووم كله خايف:
أنتم مين تبع مين انا اللي كنت بأصرخ مع إني انا اللي فتحت الباب يااااااااااااااااااااااااه لو هم دول اللي احنا خايفين منهم ادخلهم بيتي بإيدي ربنا احفظنا و احرسنا قلبي بيصرخ بأعلى صوت و من غير صوت يا دوب وصلت لفوق قلبي كان هيقف نااااااااااااااااااااااااااااار اول مرة اشوف نار بالشكل ده فى بيتي انا ممكن تهدد حياتي ابني و مراتي بابا و ماما و اختى فى لحظات الشباب نطوا على السطح ميه.... بسرعة إلحقوا هنا النااااااااااااااااااااار طلعت فوق لقيت نفسي فى قلب النار مش مشكلة الدخان مع اني مش شايف مش مشكلة رجلي حافية و لا الشبشب بيحميها من النار الميه بتنزل من كل حتة حوالي بتنزل حتى علي كل الناس متجمعة و بتساعد من كل حتة النار ابتدت تهمد لكن فى لحظات بتقوم تاني الحق النار هتمسك فيك يا ماجد الناس بتصرخ و انا باصرخ ميه.... بسرعة ارموها على النار و علي الحمدلله النار اتطفت طيب هي جات منين محدش عارف طيب ازاي محدش عارف مين المسئول محدش عارف أنا قلت بيتي بقى عامل زي البلد بالضبط النار والعة فيه و برضه محدش عارف الشباب و الرجالة حوالي فعلا رجالة ده بطفاية و ده بخرطوم و حلة وبستلة ميه برضه مصر بخير نزلت من السطح اسود من النار و الدخان بانقط ميه من كل حتة فى جسمي نزلت بعد ما استنيت شوية لحسن تقوم النار تاني طبعاً كنت اخر واحد نزل و اول واحد فى وش النار و قلبها دخلت بيتي و انا بانهج و مش شايف قدامي على الدش على طول يمكن اعرف اشيل السواد و التعب مفيش فايدة الميكروفونات فى الشارع بتنادي بتقول ايه مش عارف مش قادر اميز اجري بسرعة على البلكونة فيه ايه يا ناس لا ده بس بيقولوا محدش ينزل مظاهرات بكرة يعني انا كنت ناقصكم قلت لنفسي ادي عيب انك النهاردة منزلتش الشارع انزل و صلح غلطتك نزلت و سمعت العجب الناس شافت النار من عند قسم المطرية بعد ساعة يمكن ناس جاية تسأل هو فين البيت اللي اتحرق جايين منين و مين قالكم من الميدان و سمعنا باللي حصل طيب الف شكر يا شباب ربنا يبارك فيكم قعدت شويتين كالمعتاد شربت شوية شاي فى الخمسينة عملناهم على نار هادية على الركية كنت محتاجهم قوي بعد اللي حصل الساعة بقت 5 كفاية بقى و نطلع ننام ضابط جيش يا جماعة بيحذر الحقوا و استعدوا يمكن ييجوا دلوقتي دول جيش جرار مش هينفع شوم و مطاوي استعدوا بانار ضرب نار قنابل المولوتوف صحوا الناس بسرعة اتخذوا مواقعكم استعدوا الكلام ده جد و لا هزار ده جد الجد كمان واحد مننا طلع و وصل لغاية الجيش و سأل قالوا ممكن فى اي وقت هم مستهدفين مكاتب المخابرات لحظنا الحلو جنبنا مكتبين للمخابرات يا نهار مش باين لونه استعدوا يا بشر اجهزوا خدوا بالكم الساعة وصلت 8 الصبح محدش جه تعبنا بجد طلعنا البيوت ربنا يستر بيشو كان نايم اول يوم ينام فيه بدري كان متطمن اني معاه و مانزلتش الشارع كان متطمن و نام محسش بأي حاجة لا نار و لا تحذيرات بيشو نام و انا اللي معرفتش بجد انام