الراسل: يوسف ثابت
انسحبنا علشان اتمرمطنا
اداست كرامتنا وراحت هبيتنا
ومتطلوبش مننا نبين خبيتنا
وبنطلب منكم تداروا على فضيحتنا
ده لسان حال رجال الشرطة العظام*** أمن بلدنا اللي بقى حيطان
حيطان ايه ده بقى حطام*** ولا على إيه*** الضرب في الميت حرام!
طب ما تيجي نشوف آخر الشر*** ونرجع قبليها بشهر
قم اقف ياد سيادة الرائد معدي*** طب ما يعدي يا باشا هو هيهدي
هو من إمتى عنده محطات*** ده طالع واكل نازل واكل ومعندوش مطبات
انت بتقول  حاجه يلا*** لا يا باشا ربنا يخليلك لينا انت وسياده اللوا 
 بقولك رائد يلا مش على كلامك  تحاسب*** معلش يا باشا أصلي مش هناسب
انت كمان بتتريق  طب حبس اربع أيام*** ليه يا باشا كده دانا كنت رايح انام
يعني عايز تفهمني انك في حالك؟*** يا باشا دي اللقمة أنا مش مالك
انت  هتعيش  الدور عليا***  يا باشا دي مصر هي اللي ليا
طب روح ومشفوش وشك  هنا تاني*** ليه يا باشا هو هيتقفل تاني
اه اصل ابن اخت سياده اللو معدي*** هي جت عليه ربنا يخليكم للبلد دي
وبعد كده ب25 يوم
أيوه يابني في إخبارية جاتلنا*** إن مصر متبهدله
حضر نفسك وجهز قوتك*** وكده تبقى جاتلك فرصتك

في يوم 28 يناير
أيها الشعب جاءنا البيان التالي من رئاسة الجمهورية؛ قرر سيادة الرئيس بصفته الحاكم العسكري:
أن تساعد القوات المسلحة قوات الأمن والشرطة في حفظ أمن البلاد واستقرارها
ودبابات الجيش نزلت والمدرعات نزلت*** والشرطة هربت واضربت
 دلوقتي عرفتوا يعني إيه مظلوم*** يعني مقهور مكبوت مذلول
عايش  في بلدي بس عبد*** صوتي مش مسموع دانا في جبل بهد 
أقولكم ارحموا في يوم لكل ظالم*** تقولي ولا يهمني يا عم دانا ظابط
طب خلي نجومك بقي تحميك ولا وزيرك خليه يخبيك
ولا على إيه.. أيها الأخوه المواطنون؛ بعد فشل الحكومة في تنفيذ مهماتها أطلب منها تقديم استقالتها.
ولا عادلي ولا حبيب.. ورحل وزير التعذيب
ليه ما احنا كنا كويسين*** ولا هو لازم انتفاضة وناس مدهوسين
بس لازم أقولكم
انسحبتوا علشان اتمرمطوا
اداست كرامتكوا وراحت هيبتكوا
ومش بنطلب منكم  تبينوا خبيتكم
 ومش  هنداري على فضيحتكم
لحد ما كل واحد فيكم افترى.. على حد يقوله حقك عليا
وتقول مصر آسف.. ولربنا سامحني دانت اللي ليا
مش عارف ليه مش مستريح للكلام ده.. ما تيجوا نشهد شويه للحق
نشوف عشنا ازاي اليومين اللي فاتوا*** ركبك خبطوا في بعض ازاي وسابوا
صدقني من كل قلبي ميه تحيه وألف تمام*** أصل أنا من غيرك معرفتش أنام
أتاري بعد ربنا انت اللي مديني السلام*** فبجد ألف تمام
نسيت إن في 73 حاربت عني*** نسيت إن بسببك كنت عايش متهني
نسيت إنك كنت حاميني بتأني***  نسيت إنك كنت بتفهمني
نسيت ‘نك كنت تدعم فلسطين*** بس مش زي عبد الناصر نسيتني
نسيت إنك كنت بتحبني ومقدرني*** مش زي السادات بتعتقلني
نسيت إنك جبتلي حقي من اللي قتلوني*** وحاكمتلي اللي أرهبوني
مش معني كده إن اللي قبلك وحشين
بس انت زي مابيقولوا مسك الختام *** ولو انت حلم هفضل طول عمري أنام
وموقف الكنيسة واضح وصريح*** معاك يا مبارك بالعربي الفصيح
 كل اللي مش عايزه ليه مبيسالش*** هو ليه مستخباش ولا مهربش
علشان هو راجل بجد*** وزي اي مصري عطاوه ملوش حد
مش ده المهم يا مصرين في أهم
كلمه ونصيحه ولازم اقولها***  اصحوا يا مصريين إحنا في محنة
محدش بيحميها  غير ولادها*** والجواسيس والعملاء في أساسها
لازم نفوق ولازم نصحى*** لازم بسرعة نعدي الأزمة
 لكل صياد في ميه عكرة لا*** مش في بلدنا هتسرق ولا هتنهب ولا تتاكل
بس أرجع وأقولكم..  في العالم كله زي بلدنا متلاقيش
فوحياة أبوكم  حطوها في عينيكم