بقلم: مايكل فارس
اللقاء الأخير اللي تم بين الشيطان وحزلئوم، كان الشيطان زعل ومشي من رخامة حزلئوم، بس حزلئوم قعد يتصل بية مرة وتنين وعشرة والشيطان مكانش بيرد. وبعد عشرات الإتصالات رد، وإتففوا يتكلموا تاني علشان حزلئوم سأل الشيطان: إزاي الشيطان هدفه الأساسي يبعد الناس عن الدين، لكنه قاعد يقربهم منه بشكل غريب، بالرغم أن تقريب الناس من الدين المفترض يقوم بيه ربنا علشان يقرب الناس ليه؟! وحب حزلئوم يعرف الفرق بين الله لما يقرَّب الناس للدين!! وبين الشيطان لما يقرَّب الناس للدين!!

حزلئوم: أهلا شوشو اذيك واحشني أوي أوي..
الشيطان: أهلين حبيبي.. كيفاك؟
حزلئوم: ههههه لا والله (باينلي كده وقعت في شيطان لبناني هيطلع عيني)
حزلئوم: عايز أعرف منك إذاي بقى بتخلوا الناس تقرَّب أوي من الدين؟ وإية حكمتكم تخلوهم مايفكروش غير فيه، مع إن ربنا المفروض يعمل ده؟
الشيطان: يؤبورني هيك السؤال؟
حزلئوم: لا وحياة الغاليين، كلمني بالمصري عشان مبفهمش لبناني.
الشيطان: بص يا برنس؛ بص يابو الكباتن.. إحنا لا يمكن طبعًا نمشي على نفس الطريق اللي فيه ربنا، إحنا خطين متوازيين لا يمكن يلتقوا أبدًا، ربنا بيقرب الناس من الدين وإحنا كمان بس الاختلاف في الحرف والجوهر..
حزلئوم: يعني إيه الاختلاف في الحرف والجوهر؟
يعني إحنا بنشتغل على فهم حرفي للدين ونصوصه وربنا عايز جوهر الدين. فالظاهر إن إحنا الاتنين بنقرب الناس ليه بس الحقيقة غير كدة.. وإحنا بنكثَّف جهدنا على فهم الناس لحرف النص، وبكدة بنبعده عن الجوهر اللي عايزه ربنا..
حزلئوم: طاب وبعدين بتحققوا هدفكم إزاي؟
الشيطان: بكدة إحنا بنخلي كل فرد يتمسك أكتر بفهم حرفي بالنص الديني ومش بيقدر يفهم الحكمة الإلهية المقصود منها، وهو بيتهيأله إن دي الحكمة الإلهية. وبالشكل ده بنسيطر عليهم عن طريق الدين وإحنا مستخبيين ورا الحيط متداريين. بالإضافة إلى إننا زمان كنا بنمسك كل فرد لوحده وبنتعب نفسنا، دلوقتي خلاص رمينا الأفكار الجديدة وبنستخدم أحدث الوسائل والتقنيات في علم النفس وبنقدر نسيطر بيها..
حزلئوم: يعني إيه فهمني أكتر؟
الشيطان: بص يا إكسيلانس؟
حزلئوم: ده إنت قديم موووووووووووت؟ ياعم الكلمة دي إتلغت من زمان!
الشيطان: بص ياحزلئوم أفندي!!
حزلئوم: يا حزلئوم أفندي؟... دة على أساس إن إحنا طالعين من أفلام أبيض وإسود.
الشيطان: شكلك هترخم وأنا حذَّرتك... همشي..
حزلئوم: خلاص ياعم.. إزاي بقى بتسخدموا أحدث الوسائل والتقنيات في علم النفس للسيطرة علي البشر؟!
الشيطان: إحنا دمجنا علم النفس مع الإشتراكية وعملنا خطط حديثة للسيطرة.
حزلئوم: هي مملكة الشياطين مع النظام الإشتراكي؟
الشيطان: إي نعم...إحنا مع مبدأ العدالة الاجتماعية والتوزيع العادل للخطايا.. وشعارنا "خطية لكل مواطن".. وعملية الدمج بتتم عن طريق خلق عقل جمعي فئوي، بمعني كل طائفة معينة بنخلقلهم عقل جمعي خاص بيهم يحارب العقل الجمعي الخاص بالطائفة الثانية، وبكده المشاكل بتتخلق بين فئات كتيرة أوي من غير جهد كبير..
خد عندك مصر مثلاً، إحنا ولله الحمد قدرنا نقسم المصريين لطوائف على أساس الدين أو بمعنى أصح الفهم الحرفي لنص كل دين. خليينا المسيحيين يغرقوا في عقل جمعي يعتمد على خوفهم من المسلمين، وخلقنا عقل جمعي للمسلمين يعتمد على كرههم للمسيحيين، وبكده بمجرد ما نزرع فكرة صغيرة في عقل أي حد من المجموعتين تلاقي أوتوماتيك العقل الجمعي لكل فئة اشتغل من غير ما نتعب نفسنا ولا نروح لكل واحد نوزة شوية... وبكدة إنت تلاقي مشكلة بسيطة بين مسلم ومسيحي البلد كلها ولعت.. انت سمعت عن مشاكل السلفيين الأخيرة ومحاولة هدمهم لبعض الكنايس وأضرحة وغيره من اعتداء على أقباط؟ إحنا كل اللي عملناه فكرنا مجموعة منهم بحرفية النص الديني وقلنالهم في ودنهم "المسيحيين كافريين" بس كدة.. العقل الجمعي اشتغل كلهم اتلموا حرقوا وضربوا، والعقل الجمعي المسيحي اشتغل بإنهم مضطهدين وإتغذي كرههم للمسلمين.
حزلئوم: يااااااااااااه ده إنتوا أولاد لذينا
الشيطان: طبعًا يابني.. هسيبك دلوقتي علشان المدام بترن عليا ع الموبايل تعبانة حبتيين عايز الحق أوديها المستشفي.. عقبال أمالتك هي حامل... سلام
حزلئوم: هتسموا المولود إيه؟
الشيطان: وإنت مالك ...بني أدم رخم صحيح!!!!