بقلم: أماني موسى
تحت شعار حصري على التلفزيون المصري ياما بنشوف ونسمع، والشهادة لله فعلاً كل حصري بنشوفه على تلفزيوننا المصري وبالإمارة أفتكروا صورة الميدان وقت الثورة، وعلى رأي وديع "أفلام عربي أم الأجنبي". لكن دلوقتي في عصر التطور والانفتاح بقى فيه يجي ترابنتشر قناة تانية وكلهم ولله الحمد بيتكلموا في وعن السياسة.
ولما ربنا يكرمك كدة وتبقى مواطن مصري أد الدنيا وتتابع برامج التوك شوز هتلاقي الخبير السياسي والمحلل الاستراجيجي والناشط السياسي والكاتب والمفجر و و و .
وكلهم ما شاء الله ولا حول ولا قوة إلا بالله سياسيين بارعين ومن أدواتهم متمكنين ، وأولى أدواتهم هي حاجة طويلة كدة مستخبية جوة فتحة الفم اسمها لسان طووويل.
 

أول حاجة الخبير السياسي دة هتلاقيه رجل خبرة كدة، أكل عليه الدهر وشرب وكان له علاقة بالمطبخ السياسي وحافظ كم موقف وكم مثال وكم خبرة ويفضل يلت ويعجن فيهم في كل برنامج مش خبير بقى!! ونسبة استيعابك لكلامه هتعتمد على درجة ذكائك العالية وكمان درجة أكلك للفول والفلول، لكن لو مفهمتش برضه أوعى تيأس من رحمة ربنا وأتاكد إن العيب منه أو من المخرج لكن مش منك.
 

المحلل الاستراجيجي دة أبسط في كلامه من الخبير وطول مهو قاعد بيحلل ويحلل لغاية ما أنت مخك يتحلل ومفيش مانع أنك تحلل سكر وضغط وإنيميا لأن دي كلها أعراض واردة جدًا بعد ما تسمع البرنامج.
 

أما الناشط السياسي دة بقى أوعى لأنه لسان حال الشعب .... وليه بقى ناشط إيه اللي نشطه يعني؟ هجاوبك وبلاش حقد طبقي وقلب كروهات ... الإجابةى ببساطة لأنه نشط جدًا على الفيس وتويتر وبيكتب إستاتيوس معبرة ونشيطة وممكن كمان يكون "”top commenter مش زيك لو شفت الفيس تقول يا غربتي.
ويا حبذا بقى لو أدمن لجروب وللا عامل مدونة وبيشتغل بسم الله ما شاء الله بلوجر أد الدنيا.
 

الكاتب والمفجر بقى هو اللي بيكتب كتير ويقول كتير وبعدها يفجر كم "أونبلة" سياسية يفاجأ بيها المشاهد زي المسلسلات التركي بالظبط، وعشان كدة وأنت بتتفرج متنساش تاخد لك ساتر أو حط المدام في وجه التلفوز ويمكن ربنا يكرمك وتنول حريتك الكاملة الشاملة.
بص يا عزيزي المواطن المصري الشريف العريف.... أختار أنك تكون أي نوع مما سبق عشان تبقى رائد كبير من رواد الفضاء.