يسرا اللوزي : انا مكنتش عاوزة امثل

 قالت الفنانة يسرا اللوزي  خلال لقاء مع أون سكرين ، كنت بمثل قدام المرايا وانا صغيرة ، كنت بمثل على نفسي ، اولا انا عمري ما كنت احب اكون ممثلة ، وعمرنا ما فكرنا وانا صغيرة اني ابقى ممثلة ، مش عشان هما في المهنة شوية ، انا ماما مش في المهنة اوي ، ماما كانت بترجم افلام الكارتون بتاعة ديزني من الانجليزي الى العربي ،  كانت قريبة من المجال ، في نفس الوقت بابا عشان المسرح ، بس بابا مكنش ابدا جزء من المهنة بالشكل دا هو اكتر في المسرح الاكاديمي ، هما الاتنين مكنوش جوة المجال بالشكل المفهموم ، طول عمرهم بيحترموا اختياراتنا انا واخويا ، وصدفت ان انا واخويا نشتغل في السينما من غير ما يضغطوا علينا .

 

وأضافت الفنانة الشابة ، في السينما كان اول فيلم ليا اسكندرية نيويورك ، وجه بالصدفة ، انا كنت عاوزة امثل فقلت أروح وحصل العكس ، استاذ يوسف شاهين كان بيدور على شخص بمواصفات معينة ومكنش لاقيه ، كان عاوز اربع حاجات تتحقق في الشخصية دي زي تكون بتعرف باليه ، يعني حد يكون عنده خلفية في فن الباليه ، شبه الفنانة يسرا عشان نلعب نفس الدور ، السن صغير من 16  ل 17 ، ويكون في شوية خبرة في التمثيل ، عشان في الاخر ده فيلم ليوسف شاهين .

 

وأضافت ، بعد ما خلصت الفيلم ده ، رجعت امتحانات الثانوية العامة ، ومفكرتش خالص اني ممكن امثل وقت الجامعة ، كان بيجيلي عروض كتير ، قررت مع اهلي اني هركز في دراستي وبس ، ودرست علوم سياسية ، في اخر سنة جامعة كان في مسرحية واشتركت فيها ، كنت مبسوطة ، كان فيها غنا ، اتعرض عليا اني امثل وانا بعمل بروفات الرقص في المسرحية في مشروع تخرج اسامه العبد من معهد السينما ، واشتغلت معاه ، واكتشفت اني استحالة اشتغل موظفة واقعد على مكتب ، ساعات كتير افضل ارفض اعمال بسبب سوء السيناريوهات ، لكن لو فيلم دمه خفيف بقبل اشتغل فيه ، طالما هيعجب الناس ، ومش لازم اشتغل في افلام عميقة طول الوقت ، انا اشتغلت في مسلسل دهشة مع المخرج شادي الفخراني ، لان المسلسل كان جيد ، سهل تلاقي مسلسل كويس عن سيناريو فيلم كويس .