بقلم: مايكل فارس
معدوم الدخل ومجتمع الاشياء

جالي في يوم من الأيام مواطن من الهم حزين ؛ وفـ عيونة بحور ألم وأنين ؛ كان بيدور علي شغل ؛ بعد ما الزمن رماه ؛ وغدر البشر خلاة شئ من الاشياء؛ و بعد ماكان إنسان بيعشق الاشياء ..جة يوم وأصبح هو شئ ذيهم ...وده الحوار اللي دار بيني وبينة :

عايز اية يامحدود الدخل؟

يجعلة عامر ياسعادة الرئيس أنا مش مواطن محدود الدخل .أنا مواطن معدوم الدخل نفسي أكون سعيد والرزق يكون في ألايد والشغل يكون أكيد!!!!!!.
أنا مواطن معدوم الدخل والحيلة والحياة بالنسبة ليا شبة مستحيلة وحوليا في كل مكان ذئاب كتيرة ؛ مش مخلياني أتهنة ؛ وكل ما أتمني ...يطلعوا عليا ويقتلوا الامل اللي إستنة؛ كتير علشان يطلع وكل مايطلع يرجع يستخبة ؛ ويستني النهار يطلع ونور الشمس يسطع يمكن يخرج من المخبة ؛ بس بيطلعوا تاني وبيقتلوا الفرحة في ثواني .

أنا المواطن معدوم الدخل اللي ملياش نصيب في الفرح ؛ بس تاريخ عمري جرح في جرح ؛ كنت بحلم بمكان أسكن فية وشغلانة اشتغلها ومرتب يكفيني ..محلمتش بقصر ولا عربية ؛ ولاحلمت أكون حوت وسط الاسود ؛ ولافكرت أكون طاغوت .حلمي ياريس ..إني إعيش عيشة مستورة ولقمة هنية وقرشين يكفوني لاخر الشهر من غير حوجانية

حزلئوم: ياااااااااه ده كلة شايلة في قلبك وساكت يامعدوم الدخل ؟
معدوم الدخل : كان نفسي أشيل العار عني بس مقدرتش .
حزلئوم : عار إية؟
معدوم الدخل : عار الفقر وقلة الحيلة
حزلئوم : وهما دول عار؟
معدوم الدخل: أيوة عار عليا أكون فقير ..وعار عليا معيش فلوس وعار عليا أحلم ؛ وعار عليا أنبسط
حزلئوم: ومن قال إن ده عار؟
معدوم الدخل: مجتمعي بدة حكم...وعليا قراره إتوصم ..وأصبح قاعدة من الوجود للعدم.
حزلئوم : أنا شايف إن العار وكل العار علي المجتمع اللي بالظلم إحتكم ؟
معدوم الدخل : كان نفسي يعاملني كأنسان..أنا إنسان ....صحيح مش معايا جاه ولا أموال بس معايا عقل شغال وقلب للخير ميال
حزلئوم : أنا شايف انك مثقف يامعدوم الدخل ؟
معدوم الدخل : من الظلم اللي إتظلمتة كرهت الظلم ..ومن اللي كذبوا عليا كرهت الكذب..ومن حقد البشر كرهت الحقد... ماحبتش أكون واحد ذييهم أو منهم

حزلئوم: إنت أثرت فيا يامعدوم الدخل ..وخليتني أفكر في حال أوضاعك وأمثالك من البشر اللي عايشيين في الدنيا وشايليين من الهم والحزن يكفي من الاكوان ملايين؛ إنت ضحية مجتمع علي الاخلاق داس وخلاها تحت الرجل مداس تنداس؛ ونسيوا إنهم بشر؛ نسيوا إن فية "إنسان " خلوه شئ من الاشيا ؛ خلوه سعلة يبيعوها ويشتروها ويغيروها في كل الاحياء
مقدرش أقول غير إنك في يوم من الايام كنت إنسان وأصبحت شئ من الأشياء في حياة " مجتمع الأشياء "