بقلم: مايكل فارس
وأنا ياعيني شفت بعيني محدش قالي أداء المجلس العسكري، وشفت بعيني أحداث مجزرة "ماسبيرو"، وشفت اللي ماشفتوش من خلال الفيديوهات الحية اللي رصدت كل حاجة، وشفت بعدها مؤتمر المجلس العسكري الذي أكَّد الحقائق الآتية:

عدد المتظاهرين الأقباط ستة آلاف.. على أساس إن مفيش حد كان قاعد ولاكاميرات صوَّرت مئات الآلاف المتظاهرة.
مفيش قناصات عندهم.. على أساس إن مفيش دولة في العالم مش هتبطل ضحك أما تعرف إن جيش ماعندوش قناصات، مع العلم إن في قناصة في الدور الـ 11 وليهم مواقع في سطح مبنى "ماسبيرو"، ودي معلومة أكَّدها عسكري مجنَّد في خدمة "ماسبيرو" وقع بلسانه وقالها في حديث لابن خالتي، وأما وقع بلسانه اتبرجل وغير الموضوع.. ده غير الصور اللي اتصورت في مظاهرات "التحرير"، وكان أحد القيادات مكتوب على لوجو في كتفة "فرقة القناصة"، والصورة مالية الفيس بوك.

عدد اللي بيحرسوا "ماسبيرو" (300) جندي فقط ومعهمش زخيرة حية.. على أساس إننا أطفال ومش فاهمين حاجة، ومفيش كاميرا توحَّد الله شافت الآلاف اللي كانت محاصرة المبنى من كل الجهات.. لا والتقيلة أوي إنهم معهمش زخيرة حية.. فقعدت أقول في نفسي "أنا مش مواطن ذكي ولا حاجة، أنا مواطن غبي وبريالة".. والناس اللي ماتت دي موتت نفسها، ومفيش فيديوهات رصدت إطلاق النار الحي من الجنود عليهم.. وممكن يطلعوا يقولوا دي زخيرة فشنك.. واحنا لازم نصدق إن جيش بيحرس مبني حيوي بزخيرة فشنك.

والضربة القاضية كمان قصة المدرعة المسروقة.. على أساس إن المدراعات مابتكونش في وسط القوات، وعلى أساس إن القبطي البطل اللي سرقها دخل وسط القوات وقتل الثلاث جنود اللي فيها ودخلها ومحدش من الجيش ولا الأمن واخد باله وخدها، وبما إننا مدربين على سواقة المدراعات خدها بسهولة وساقها عادي، وهي من جوه بالمناسبة ذي العربية فيات (128)، يعني سواقتها سهلة، وعلى أساس إن القبطي اللي سرقها قاعد يدهس في الأقباط معرفش ليه، بس أكيد كان قصدة كده.

والضربة القاضية الكلية الجزئية، إعلان الحرب الأهلية عبر التليفزيون المصري ودعوة المسلمين الشرفاء لنجدة الجيش المصري من الأقباط غير الشرفاء اللي دمروا الجيش!!.

بالإضافة للإعلان عن عدم ذكر أسماء شهداء الجيش ولا عددهم حفاظًا على الروح المعنوية للقوات المسلحة!.. يعني كده هنبصم بالعشرة إن لو دخلنا حرب مش هيتم الإعلان عن استشهاد جندي واحد، وهنستعمل أسلوب إعلام 1967.. علشان الروح المعنوية.. هنستعمل الكذب ونقول لم يتم إصابة جندي.. علشان روحنا المعنوية.. وعجبي!!.

هم يضحك وهم يبكي.. شوفت على الفيس بوك، ومن خلال أحد الجروبات، تم نشر أهم إنجازات المجلس العسكري منذ توليه البلاد في فبراير الماضي.. والجميل إن الإنجازات ممكن تتعمل في سنين ولكن لسرعة الأداء عندنا في "مصر" حصلت في شهور بس، وأهمها:
(7) وقائع، و(2) مجزرة، و(4) أحداث عنيفة، و(3) أحداث طائفية، و(12000) معتقل مدني، و(30) ضابط جيش مسجون.

أولًا- الوقائع:
1- موقعة الجمل 2 فبراير.
2- موقعة الجلابية (مش فاكر بالظبط لأنها كانت كوميدية مش عنيفة).
3- موقعة العباسية 23 يوليو.
4- موقعة "التحرير" أول يوم رمضان.
5- موقعة الاستاد مع "الألتراس".
6- موقعة السفارة الأولى 15 مايو.
7- موقعة السفارة التانية 9 سبتمبر.
8- موقعة كوبري القبة 30 سبتمبر.

ثانيًا- المجازر:
1- مجزرة 9 أبريل.
2- مجزرة "ماسبيرو".

ثالثًا- الأحداث العنيفة:
1- اعتصام شفيق 25 فبراير.
2- اعتصام 9 مارس.
3- أحداث مسرح "البالون"، والتي تطوَّرت إلى اشتباكات في "التحرير" 28 يونيو.
4- السفارة الإسرائيلية في ذكرى النكبة في مايو.

رابعًا- الأحداث الطائفية :
1- أطفيح.
2- منشية ناصر.
3- إمبابة.
بالإضافة لوجود (12000) مدني معتقل في السجون العسكرية، و(30) ضابطًا من خيرة ضباط الجيش في السجون العسكرية بأنواعها.