ناعوت وحلة المحشى !!!

الرحمة يا ست الشاعرة بما أنك ست مميزة ومالكيش في المحشى البيئة بتاع الناس البيئة " ياه ياه ياه ..

ياى " فأنا طفيت على حلة المحشى عشان أرد عليكى !!

معلش لامؤاخذة أعذرونى النهاردة هاكلمكم بالعامية مش زى ماعودتكم في مقالاتى أن الكتابة تكون باللغة العربية ..

 

ودى أول مرة في حياتى أعملها ، ليه قولتولى ليه لأن الموضوع النهاردة كبير ودخل في المحشى ومع المحشى ماينفعش لغة عربية !! فقلت بما أن الكلام عن حلة محشى ناعوت يبقى لازم نرحرح ونتكلم بالعامية بالبلدى يعنى ومفيش أحسن من المحشى ..

 

أقصد مفيش أحسن من البلدى .. البلدى يوكل ، وعشان كمان نقول للست ناعوت أن شعرك مفيش حد بيقراه إلا أنتى وكمان في واحد يعرفك كويس معرفة قديمة قال أن ثقافتك متواضعة وأن الشعر اللى نسبتيه لنفسك كان المرحوم الله يرحمه هو اللى بيكتبهولك .

 

. لو حابة نقول إسم المرحوم مفيش مانع !! وكلامى دا أن دل على شيء لا يدل سوى على أن حلة المحشى أهم من شعر ناعوت مصدر فخرها الامتناهى !! وأجدادنا قالوا ساعة البطون تتلهى العقول .

 

. يعنى شوفى كدا وأنتى قاعدة في ندوة والناس عاملة أنها بتسمعك وفجأة قالوا لهم البوفيه اتفتح ..

 

هاتلاقى الكل بيسيبك لشعرك الحلامنتيشى ويجرى على البوفيه وياسلام لو كان البوفيه فيه محشى بأنواعه المختلفة !!!

 

الشاعرة اللى بتقول أنها كاتبة أو الكاتبة اللى بتقول أنها شاعرة بتقوم حالياً بالتهييج على ستاتكم يارجالة بتقوم بتأليب المتطرفين على المسيحيات أي على زوجاتكم وبناتكم وإخواتكم فتقول ناعوت " عشان الستات "تريز ومنال وغيرهم " اللى سايبين حلة المحشى على النار تتحرق ونازلين شتيمة في الإسلام وفى الرسول وفى مصر وفى الرئيس السيسى وفى قداسة البابا وفى الكاثوليك وفى بابا الكاثوليك وطبعاً في حضرتى ، وشاغلين نفسهم بحاجات صعبة عليهم زى القصائد والعروض والصور الشعرية والإستعارات والمجازات والرموز والدلالات والإحلالات ..

 

الشعر غير المحشى ياستات .. المحشى أهم مفيش كلام بس وحياة ربنا سيبوا الشعر في حاله " 

* واخدين بالكم كويس من الأسماء العشوائية التي توحى بأن أصحابها مسيحيين لا غش فيهم !! حتى في المسلسلات العربى لما يحبوا يطلعوا ست مسيحية يسموها "تريز" فالأخت ناعوت بتلفت نظر المتعصبين أمثالها والمتربصين للسيدات المسيحيات اللى هن طبعا جاهلات ومايعرفوش غير في المحشى عشان السيد ناعوت ..

 

أسفة أقصد السيدة ناعوت أنا أصلى نسيت أنها ست ولها في المحشى من كثر ماركزت على أن الستات مالهمش غير في المحشى فهى تحتقر الستات عشان بيطبخوا لبيوتهم وكٲنها ذكر مش ٲنثى ومن وجهة نظرها اللى بتطبخ تبقى مالهاش فى الثقافة رغم ان هناك دكاترة جامعة ووزيرات وبيعملوا محشى !! لكنها لغة الشيطان فى التعالى على البشر اللى هو عارف ٲنهم ٲحسن منه ومميزين عند الله .. لكن هي الشاعرة الفريدة من نوعها معندهاش وقت للمحشى والكلام الفارغ بتاع الستات عشان الهانم مشغولة بالشعر اللى بينقط منها ليل ونهار ولا يوجد وقت فراغ لجمع الأموال والسفريات وحتى للمحشى عشان الشعر .. الشعر ياجماعة الشعر .. مش فاهمين يعنى أيه شعر والا انتم مش بتفهموا غير في المحشى!!!

 

الاحظ دايما أن ناعوت بتحط أسمها ضمن قائمة الباباوات والرئيس والدولة يعنى هي بخبثها ومكرها المعهود تحاول لصق وتاكيد تهمة للستات المسيحيات أنهم بيشتموا البابا تواضروس وبيشتموا الكاثوليك وبابا الكاثوليك وبيشتموا الرئيس وبيشتموا مصر ..

 

تحس أنها بتنقط في فرح بلدى وشوية وتقول رقصنى ياجدع !!! وهى عشان شخصية نرجسية بتقولكم وبيشتموا حضرتى .. أي ناعوت ، بتحترم نفسها زيادة شوية ماتاخدوش في بالكم !!! المهم بدل ماتقول بيشتمونى ويكشفوا حقيقتى وحقيقة نصبى وخداعى ، لا بتقول أن المسيحيين بيشتموا العالم كله ومن ضمنها هي سيادة المهمة اللى أسمها يلتصق بالباباوات وبالرئيس وبمصر .

 

. المسيحيات يشتموا في مصر؟!!! ، دا المسيحيات يعلموا أمثالك الوطنية.. لا المصيبة الكبيرة بتقوم بتهييج الأخوة المسلمين المعتدلين منهم قبل المتعصبين أمثالها على الستات الأقباط وبتقول المرة دى أنهم بيشتموا الإسلام والرسول ولأن دا إتهام خطير ضد نساء الأقباط ، وتحريض صريح ضدهم ، فدا بلاغ منى ضد ناعوت وياريت أى محامى مسلم كان أو مسيحى يحب هذا البلد وعنده شيء من الوطنية يقوم بتقديم بلاغ للنائب العام ضد ناعوت يتهمها بإثارة الفتنة والبلبلة بين الأقباط والمسلمين وتكدير السلم العام ، وتهييج الرأي العام ضد السيدات المسيحيات مما يعرض حياتهن للخطر، وتهديد حياتهن من المتطرفين أو المتعصبين أمثالها !!

 

مقالى الآخير اللى كتبته أدافع فيه عن البابا تواضروس ضد أعمالها الشريرة وكلكم قرأتوا المقال ..

 

بعتت اللجان الإليكترونية وصفحاتها الوهمية ينزلوا تعليقات على المواقع اللى نشرت المقال توحى للقارئ قبل أن يقرأ المقال بأنى أسب البابا تواضروس رغم أن المقال كله رد على ناعوت ودفاع عن البابا ، بتوحى أنها بتحب البابا أكثر من أبناء شعبه .. بجد ربنا يشفى .. يمكن هي بتحقد علينا لأن معندهاش جو البابا وأولاده ، وأنه أب لشعبه فعايزة تحس بالشعور دا وتقمصت الدور وكذبت الكذبة وصدقتها !!!! ..المهم بيحاولوا يوهموا القارئ أن المقال ضد البابا مش ضد ناعوت عشان محدش يقرأ الرد عليها وتبعت المقاطيع مدفوعى الأجر يشتموا الكاتب ويطمسوا الحقائق !! .. بجد شيء مخجل وواضح أنك مابتتكسفيش ، وإن لم تستحى فافعل ماشئت ، أعرف أن ناعوت ترسل رسائل لبعض الرجال المسيحيين اللى يعرفوها معرفة قديمة تترجاهم بتنزيل بوستات تجميل لها ، وللأسف منهم من فعل ذلك ومنهم من شبهها في مقارنة غير منطقية بوزيرة الهجرة وكأن رأسها برأس الوزيرة ، والأقباط الوحشين بيهاجموها زى مابيهاجموا الوزيرة ومش بيغفروا .

 

. عايزة أعرف هم الرجالة دول لا يوجد عندهم نخوة ؟!! ، لما واحدة زى ناعوت تهيج المتطرفين على نساء الأقباط ، وتسب وتلعن فيكم ليل ونهار وأنتم يا بعدا مش بتحسوا زينا .. شوفوا بقى أي واحد محسوب في بطاقته الشخصية علينا "ذكر" وهايدافع عن ناعوت لأنها بتبعتهم على صفحاتنا يقلوا أدبهم علينا .. صدقنى مالكش عندى غير لامؤاخذة ..

 

. ودا هايكون قبل البلوك مباشرة لأنك ماتستاهلش أنك تكون على صفحاتنا لأن صفحاتنا للمثقفين وأصحاب العقول والضمير ومن يخشون الله ويغيرون على كنيستهم وإيمانهم ونساءهم غيرة مقدسة !! صفحاتنا ليست لأنصاف الرجال أو أنهم محسوبين علينا رجال عشان خانة النوع في البطاقة بتقول كدا .. وطبعاً ما اكثر رجالنا المحترمين المثقفين الغيورين اللى دافعوا عن كرامتهم ضد ناعوت وأمثالها ، لكن رسالتى هنا للخانعين الذميين عديمى النخوة والكرامة والضمير !!

 

دا غير المسهوكين اللى بعتولها على الخاص من معارفها القدام وراحت هزأتهم على العام وقالت لهم اللى مش هايشكر فيا على العام مش عايزاه يشكر فيا على الخاص وعلى رأى هانى رمزى " الخاص خاص والعام عام " فجزء منهم أعطاها كلمتين في عظمها بعد أن أعلنوا صدمتهم فيها وأنها فضحتهم على العام وقاموا بحذفها من على صفحاتهم وهم من قالوا ذلك بعد ما أعطوها الطريحة التمام عشان مايجيش واحد فتك يقولى أنت عرفتى أنهم حذفوها الزاى .

 

. أقوله هم اللى قالوا كدا في تعليقاتهم يافتك والكلام دا موجود وهاتلاقيه على صفحتها وصفحات الأصدقاء المتابعين لحملتها الممنهجة ضد الأقباط ، ولما وجدت أن الباقيين صمتوا صمت القبور ..

 

ويأست راحت صورت رسايلهم وحطتها على الصفحة وفضحتهم وقالت أنهم من المؤيدين والمعجبين وكأنها قال أيه بتشكرهم ..

خطط ياسيدى خطط .. دا انتى إبليس يتعلم منك .. 

 

وأحب أقول لرجال الأقباط كفاكم صمت ضد هذه المتآمرة على نساءكم ..

 

دافعوا عن زوجاتكم وأخواتكم وبناتكم وأقول لكل المصريين مصر قبل الأفراد فهذه المخلوقة تزرع الفتنة فلا تصدقوا أكاذيبها والاعيبها ، فهى تضر بالجميع . 

 

أقولكم سر .. الحقيقة أنا ماطفتش على حلة المحشى عشان مش عاملة محشى أصلا وخذوا الكبيرة بقى للأسف أنا مش بعرف أعمل محشى ولو حد عامل محشى يعزمنى !!!