بقلم: أشرف فايز
هو سؤال ومنتظر رده
عاوز جواب
عن بُكره.. عن بعده
واخدانا لفين؟؟
والسكة مش واضحة
وف مفرقين
يا خطوة فين رايحة؟
في طريق.. نكون متجمعين صُحبة
نعبر سوا أيامنا لو صعبة
يا طريق ياخدنا لسِكة منسية
وكل واحد يمشي فيه لوحده
يا سكة الحزن يا مرخية
ناصبة شباكك

ومجهّزة الخية
والعتمة جاية بنفس مكسورة
خايفة تبان والشمس في الصورة
مهما تخبي يا عتمة خفافيشك
مهما تقومي وتنفشي ف ريشك
خطاويكي وسط اللمة محصورة
لاكان في يوم ملحنا ملحك
ولا عيشنا كان في يوم عيشك


يا مصر قولي سكتك مع مين؟
يا مصر جاوبي وطمني العاشقين
انتي مع اللي بيعشقوا ترابك
دايبين صبابة ويمدحوا عتابك
أول حروف يقروها في كتابك
وأول خطاويهم يفتحوا لبابك
وفي سكتك راح يفضلوا ماشيين
ولا مع اللي جم مع الهوجة


وفي كل ريح بيركبوا الموجة
حسب اتجاهها بينصبوا شراعهم
وحسب هواها بيفردوا دراعهم
بيعوِّجوا العدلة.. وبيعدلوا العوجة
هو سؤال ومنتظر رده
عاوز جواب عن بُكره عن بعده
يرشد طريقي وليكي يهديني
اخترتي مين؟؟ يا مصر جاوبيني..